Qazan şähäreneñ bügenge irtäsendä , yäğni 7 noyäber irtäsendä, bigräk tä anıñ İrek mäydanındağı Lenin häykäle yanında, kiçäge tınlıqtan soñ, monda ayıruça canlanu sizelep tordı.
7 noyäber könendä Qazannıñ İrek mäydanında KPRF firqäse kommunistları Oktäber inqilabınıñ 89 yıllığına bağışlanğan uram cıyını uzdırdılar. Anda şähärneñ 7 rayonınnan da kommunistlarnıñ wäkilläre bar ide.
Qazannıñ Qamal teatrı mäydanınnan Karl Marks uramı buylap 200 gä yaqın babay- äbilär İrek mäydanına yünäldelär. Alarnıñ qullarında qızıl älämnär, bayraqlar, Stalin räseme ide. Balalarnıñ tınlı muzıka qorallı orkestrı başqaruında revolyutsion köylär yañğıratıp , demonstratsiä belän kilgän keşelär aldınnan köçle dinamiklar yärdämendä bu köylärne yañğıratıp kilüçe maşinağa da, uzıp barğan keşelärneñ iğtibarı cälep itelmi qalmadı.
Lenin häykäle yanına kilep tuqtağan bu demonstratsiäne açıp cibärergä berençe süz, KPRF firqäseneñ Tatarstan bülekçäseneñ ikençe särkätibe häm Qazan şähäre komitetınıñ berençe särkätibe Valentin Kostelevqa birelde. Ul üzeneñ çığışında Kommunistlar firqäse ilne citäklägän çağında küpme meñlägän , millionlağan keşe repressiälärgä eläkkäne turında iskä almıyça, bu rejim çorında xalıqnıñ aç yalanğaç kileş kön- tön dimi eşläwe arqasında ireşkän uñışların Kommunistlar firqäseneñ uñışları itep kürsätergä tırıştı.audio
“17 yılnıñ oktäbere Rusiägä unikal' şans birgän ide. Ul çorda inde cimerelep betkän il, üzeneñ berdämlegen häm berbötenlegen yañadan qaytara alğan ide. Häm ilgä kilgän yaña xökümät eşçe xezmätkärlärgä bik kiñ räweştä sotsial' garantiälär birä aldı. Häm bügenge zamannıñ bik küp ireşelgän cimeşläre bezneñ ilneñ Sovet waqıtında ireşelgän uñışlarına nigezlängännär”.
“Bez bügenge köndä Kommunistlar firqäsen saqlap qaldıq, anıñ möheren yañarttıq, häm qıyu adımnar belän Böyek oktäber yulı belän ciñügä barabız” dide ul.
“Bez bergä ciñğänçegä qädär köräşäçäkbez” digän şiğar astında
Kommunistlar mitingısınıñ rezolyutsiäse qabul itelde.
Sportsmen , kaskader Kirçan Çeçenbaev üz çığışında:
“ bezneñ yäşlär eçärgä sabıştılar , tartalar, alar arasında narkomaniä taraldı. Xökümät moña berniçek tä iğtibar itmi, sport seksiäläre sündelär ,- dide. Häm anıñ täqdime dä yañğıradı. Ul Sovet vlaste çorındağıça, här zur yort aldında oyıştırılğan balalar häm yäşüsmerlärneñ sport seksiälären yañadan torğızmaqçı buluı turında belderde.
Bügenge köndä respublikanıñ törle rayonnarında tözelgän boz sarayların, här yaña mäktäptä buldırılğan sport bülmälären kürmägän, ämma mitingqa çıqqan äbi- babaylar da Azatlıq radiosına üz fikerläre belän urtaqlaştılar.
Mitingka niçek revolyutsion cırlar belän kommunistlar kilgän bulsalar, şulay uq alar Lenin babay turındağı cırlar astında taraldılar da. Bu 200 çaması bulğan qızıl bayraq kütärgän äbi- babaylarnı 1 millionnan artıq xalqı bulğan Qazan şähäre kürmäde dä işetmäde dä. Mälikä Basıyr
