Yäroslawneñ “Duslıq” tatar mädäni üzäge citäkçese Kälimulla Xäyrullin tatar tele uqıtuçısın çaqırtu buyınça söyläşülärne inde elektän ük başlağan bulğan. Bilgele bulğança, uzğan yıllarnı Qırğızstanğa Tatarstannan belem birü öçen ber qız - Landış Aliewa barğan ide. Kälimulla Xäyrullin bälki tağın şundıy teläk belderüçelär bardır dip ömetlängän.
“Duslıq” üzäge citäkçese Kälimulla Xäyrullin belderüençä, tatar tele uqıtuçısı berük waqıtta millättäşlärebezne üzeşçän sänğat'kä dä öyräter ide di. İnde xakimiät belän xezmät xaqı tüläw turında da kileşelgän. Kälimulla Xäyrullin
Uqıtuçığa xezmät xaqın ölkä xakimiäte tüliäçäk, şulay uq torır urın da bulaçaq.
Kälimulla Xäyrullin äytüençä, tatar tele häm ädäbiäte belgeçlegen alğan ber millättäşebez bar, ämma anıñ üz eşe küp – waqıtı yuq dide Kälimulla äfände. Bilgele ki, buşqa ğına eşlärgä berkemneñ dä teläge yuq, ä üzlärendäge keşegä xezmät xaqı tülise kilmi. Ni disäñ dä yıraqtan - Tatarstannan kilgän keşegä ömetlär zurraq bulsa kiräk. Kürşe tawığı kürkä bulıp kürenä di bit. Läkin Tatarstannan çitkä tatar tele uqıtırğa barırğa atlığıp toruçılar yuq däräcäsendä. Çärşämbe könne Kälimulla äfände tatar kongressında da buldı, läkin älegä mäs'älä xäl itelmäde äle. Nindider ayırım yunäleş buyınça eş qaralmağanğa bulsa kiräk, tatar oyışma citäkçeläre bu mäs’äläne dä üzläre xäl itärgä tieş. Yäroslawdа isä millättäşlär kübräk bäyrämnärgä cıyılalar ikän. Uraza Ğayıtenä isä 60 keşe kilgän. “Azatlıq” xäbärçese tatar telen öyränergä teläwçelär barmı soñ digän sorawğa Kälimulla Xäyrullin
Uqıtuçı bulmağan kileş äle monı äytep bulmıy, başta uqıtuçını alıp kilergä kiräk.
Kälimulla Xäyrullin Yaroslawdağı barlıq çaralarnı üz köçebez belän uzdırabız dip belderä, yäğni xakimiättän aqça almıyça eşlilär. Şul nisbättänder dä ul eşmäkärlär belän tığız elemtädä tora. Qazanğa da ul üze belän elemtälär urnaştıru öçen alkogol' produktsiälär skladı citäkçese Yevgeniy Talızinnı alıp kilgän. Alar monda säwdä häm tışqı iqtisadıy xezmättäşlek ministrlığı, “Tatspirtprom” oyışmalarında bulıp elemtälär urnaştırırğa uylıylar. Ni disäñ dä milli eşlärne başqarğanda monnan da aqmasa da tamaçaq.
Landış Xarrasova
