Sara Sadıyqovanıñ tormışı Mäskäw belän tığız bäyle bulğanğadır, anıñ 100 yıllıq yubileyın mäskäwlelär öçençe tapqır bäyräm itte. 25 noyäberdä Mädäni üzäktä uzğan bu çarağa äzerlek tä , xalıqnıñ ixlas küñel belän ğayät küp däräcädä cıyıluı, Sara Sadıyqova xatiräsenä bulğan räxmät xisläre belän berrättän, ul konsertta barı tik Qazan artistları qatnaşuı belän dä bäyle bulğanğadır. Mädäni üzäktä ütkän ul tamaşanı Sara Sadıyqovanıñ qızı Älfiä Aydarsqaya äzerlägän. Yubiley yılınıñ bu programmasın Piterburda da, Çallıda da kürsättek, xezer inde anıñ cırları cıyıntığın çığarırğa yöribez, konsert bula da betä, ä cıyıntıq istälek bulıp qalaçaq, dide Älfiä Aydarsqaya. Älfiä xanım şulay uq, minem üzem öçen Piterbur qaderle bulsa, çönki min anda uqıdım, Sara Sadıykova öçen Mäskäw bik qaderle ide. Alar ätiem Ğaziz Aydarski belän Donbass şaxtalarına Mäskäwdän barıp cırlağannar. Şaxta zaboylarına töşep, basıp cırlarğa mömkinlege bulmağanlıqtan, minem äni anda yatıp cırlağan, dide Älfiä Aydarsqaya. Mäskäwdäge oçraşuda Älfiä xanım şulay uq internetta Sara Sadıyqova säxifäsen buldırğan Ğayar İskändärovqa räxmäten belderep, bu säxifäneñ konkursta «Tatar dönyası» nominasiäsendä berençe urın aluın äytte häm Ğayar İskändärovqa diplom da tapşırdı. Ul könne tamaşağa kilgän bar keşe dä Sara Sadıykova muzıykası aldında mökibbän bulğannarın belderergä aşıqtı. Ä inde konsertta Zöhrä Säxäbieva başqaruında “Cidegän çişmä” cırın berkem dä bitaraf küñel belän tıñlamağandır. Sara Sadıyqovanıñ uquçısı bulğan Zöhrä Säxäbievağa Orenburdan kilgän ber xanım, säxnägä menep iñnärenä mamıq şäl saldı. Ä inde tamaşa zalında utırğan Xäydär Bigiçev awılınnan bulğan ber törkem apalar, tänäfes waqıtında da küz yäşlären tıya almadılar. Tatarça, awılça , ozınçalatıp ayulıq yapqan ber apa yanınnan bolay ğına uzıp kitä almıy, añar da süz qattım. 83 yäşlek Ğiffät isemle äbi Başqortstannan bulıp çıqtı. “Cidegän çişmäne” tınıç qına tıñlap bulmıy. Anı minem qızlarım da cırlıy, dide ul. Konsert, ğäcäyep ber tamaşa buldı ul könne. Säxnä türen Sara Sadıyqovanıñ Piterbur rässäme Fäyzeräxman Kamalov yazğan räseme bizäp tordı. Daniä Nurullina häm Xälim Cälälov başqaruında Sara Sadıyqovanıñ üze yazğan häm aña bağışlap yazılğan şiğerläre söylände. Sara Sadıyqova muzıkası Marat Äxmätov başqaruında skripkada, Margarita Kavarskaya başqaruında fortepianoda, Axmät Kärimov başqaruında bayanda yañğıradı. Mäskäwlelär şulay uq Ruslan Däminov, Zölfiä Zaripova, Aygöl Xäyri, Almaz Nurgaliev İskändär Biktahirov başqaruında yañğırağan cırlarnı bik yaratıp qabul ittelär. Ä inde «Bergä ğömergä” digän cırnı başınnan alıp axırına qädär alqışlar belän tıñladılar. Konsert programmasın bik yağımlı itep Albina Möxämätşina alıp bardı. Milli mädäni möxtäriät tamaşadan soñ barlıq artistlarnı çäy östälenä çaqırdı. Bäyräm barı şunda ğına, ğädätkä kergänçä, Ğabdulla Tuqaynıñ “Tuğan tel” cırı belän tämamlandı.
Näzifä Kärimova, Mäskäw
