Düşämbe könne Qazannıñ Cälil isemendäge tatar däwlät opera häm balet teatrında bik tantanalı kiçä uzdı. Ul cırçı häm kompozitor Sara Sadıyqovanıñ tuuına 100 yıl buluğa bağışlanğan ide. Sara Sadıyqovanıñ icatına bağışlanıp uzdırılğan kiçälär, festival'lär, konkurslar bıyıl bik küp buldı. Alarnıñ qayberläre, uquçı balalar arasında -töbäk ara- festival' itep oyıştırılğan ide. Qayberläre , Tatarstan buylap häwäskär cırçılar arasında uzdırılğan konkurs- festival' buldı. Häm menä ädäbiät häm sänğät yılı tämamlanğanda “Sağınalar sine yaqın duslar” digän isem astında Sara Sadıyqovanıñ 100 yıllığına bağışlap uzdırılğan tantanalı kiçä, 11 dekaberdä Cälil isemendäge tatar däwlät opera häm balet teatrında ütte.
TR mädäniät ministrlığı tarafınnan oyıştırılğan bu kiçädä, yıl däwamında Sara Sadıyqovanıñ icatına bağışlanıp uzdırılğan çaralarğa yomğaq yasaldı häm andağı çaralardağı ciñüçelär dä qatnaştı. Kiçädä qotlaw süzläre belän çığış yasağan respublikanıñ Premyer- ministr urınbasarı mädäniät ministrı Zilä Wälieva, Flürä Aseeva -Söläymanovağa “Tatarstannıñ xalıq artistı” digän maqtawlı isem tapşırdı. Şulay uq ul Sara Sadıyqova fondına bik matur itep märcännär belän çigelgän kompozitornıñ portretın büläk itte. Häm tağın “Söyembikä” jurnalınıñ xezmätkäre Filisä xanım Xäkimovağa Qazannıñ 1000 yıllığı medalen tapşırdı. Üzeneñ çığışında Sara Sadıyqova turında Zilä Wälieva menä närsä dide:
“Sara Sadıyqova şundıy çıpçıq qına gäwdäle bulsa da, anı sanduğaç dip yörtsäk tä , ul börketlär kebek, qanatların kiñ cäyep yäşäde häm icat itte”,-dide.
Kiçäneñ konsert öleşendä Sara Sadıyqova repertuarındağı cırlar , ariälär, muzıkal' spektakl'dän özeklär başqarıldı häm anıñ muzıkal' äsärläre yañğıradı. Kiçägä Sara Sadıyqovanıñ qızı Älfiä Aydarsraya da çaqırılğan ide. Video tasmadan anıñ yäş çağı, balerina çağınnan istäleklär kürsätelde. Ğömär Bäşirov şiğerenä Sara Sadıyqova maxsus Zöhrä Säxäbieva öçen yazğan “Cidegän çişmä” cırın cırçı başqaruında tamaşaçı bik cılı qarşı aldı. “ Ul härwaqıt icadi xalättä ide, waqlıqlardan biek buldı. Häm üzeneñ bieklege yanına keşene dä tartıp menderä torğan köçkä iä ide, zur şäxes ul ”.
Yäş buın cırçılar arasınnan Sara Sadıyqova “Val's turında val's” äsären başqarğan xalıqara konkurslar laureatı Gölnara Murzieva kompozitor turında menä närsä dide. “Sara Sadıyqova minem öçen nur” dide.
Bu kiçädä başqa töbäklärdän cırçılar ğına tügel, tamaşaçılar da küp ide. Ufadan kilgän yazuçı, şağirä Dilä Bulgakovanıñ Sara Sadıyqova turında fikerlären tıñlap kitik. “Sara Sadıyqovanı bez, ul Ufağa kilgäç kürgän idek, anıñ belän oçraşqan idek. Anıñ härçaq qalfaq kiep yörüe, bezgä bik oşıy ide. Anıñ cırları bezneñ yöräkkä ütep kergän”. Kiçädä Sara Sadıyqovanıñ üze yazğan şiğerläre dä, yañğıradı. Alarnı Ğ .Kamal teatrı artistları başqardı. Sara Sadıyqovanıñ tawışın video tasmadan işetergä mömkinçelek tä buldı.
Mälikä Basıyr
