Bäyräm yallarında tatar tamaşaçısı öçen Qazanda qarar äyber yuq diärlek. Tinçurin teatrı remontta – yal itälär, “Äkiät” qurçaq teatrında da barlıq äkiätlär rus telendä genä, şulay uq Tatar yäş tamaşaçılar teatrı da bu könnärdä mäktäptäge balalarğa Yaña yıl tamaşaların kürsätü belän mäşgul', Qamal teatrı isä sezonın üzeneñ yañartılğan binasında 11 ğinwar könne genä açıp cibäräçäk. Şulay itep, törle cirlärdän qunaqqa kilgän millättäşlärebez Tatarstan başqalasında rusça tamaşalar ğına qararğa mäcbür. Ä alar Qazanda bixisap.
Kaçalov teatrında comğa könne Agata Kristinıñ “Tayna doma Vern'ye”, şimbä könne “Sin'or iz obşçestva” häm yal könne “Semeynıy portret s postoronnim” spektakl'läre kürsäteläçäk. Rus yäş tamaşaçılar teatrı şulay uq bu könnärdä köndezlären dä kiçlären dä xalıq belän tulı. Köndezen “Volşebstvo dlya prinsessı”, ä kiçlären “Ostrov sokrovişç” bara. “Äkiät” qurçaq teatrı “Po şçuç'yemu veleniyu” spektaklen täqdim itä. Qısqası, teläsä qaysın saylıy alasıñ, köndezen oyıştırılğan çaralarnıñ kübese balalar öçen nigezlängän. Mäsälän, “Äkiät” qurçaq teatrında, ike atnalıq Yaña yıl tamaşalarına kerü biletları inde küptän satılıp betkän. Spektakal'lärneñ barısı da rus telendä. Repertuarda 8 tatar qurçaq spektakle bulsa da 400 meñnän artıq tatar yäşägän Qazanda tatarça qurçaq tamaşaçılarına bilet aluçı bik az. Teatr xezmätkärläre bu biletlarnı rusça teatrlarğa östämä itep satalar.
Kinoteatrlarında da xäzer ike yañğıraşlı fil'm premyeraları bara. Yäşlärneñ kübese şularnı tamaşa qıla. “Jara” häm “Volkodav” fil'mnarınıñ ikese dä Rusiädä töşerelgän häm Qazan kinoteatrlarında 10 ğinwarğa qädär kürsäteläçäk. Monnan tış kino söyuçelär Amerikada töşerelgän “Noç' v muzee”, “Pawtina Şarlottı”, “Delay noği”, “Erağon” fil'mnarın qarıy ala. Alar “Magiä kino” kinoteatrı belän berättän yaña açılğan başqala üzägendäge “Kol'so” säwdä kompleksıyndağı zamança “Qaro”, “Riv'yera” küñel açu kompleksındağı “Port sinema”, “Tandemdağı” “Kinomaks” kinoteatrlarında kürsätelä.
Kino qarawdan buşağan waqıtta yäşlärneñ kübese timerayaqta şuuğa yöri ala. Könnärneñ kisken räweştä cılıtıp cibärüe genä moña beraz qomaçawlıy bilgele. Ämma “Megga” säwdä kompleksında häm “Tatneft'” boz sarayında eremi torğan yasalma boz şuğalağı bar. Ä balalar kübräk çırşı yanında. Ayıruça Yärminkä mäydanı häm 1000 yıllıq Qazan parkındağı çırşılarnı üz itte xalıq.
Bu könnärdä Qazan sirkında qış babay häm qar qızı qatnaşlığında Mäskäw sirkı gastrol’läre ütä. 5 yäşkä qädär balalarğa kerü buşlay bulsa, başqalarğa bilet bäyäläre 100 sumnan 350 sumğa qädär.
Şimbä könne Qazanda cırlar yazuçı – başqaruçı Zöfär Xäyretdinovnıñ konsertı uzaçaq. Şunnan soñ inde iñ zur tamaşalar Qamal teatrında kötelä. Nihayät berniçä aylıq remonttan soñ 100 yıllıq tarixı bulğan teatr sezonın açıp cibärä. 11 ğinwar könne Tufan Miñnullinnıñ “Altı qızğa ber kiäw” spektakle bulaçaq, 12 ğinwarda “Qazan sölgese”, 13 ğinwar “Telsez küke”, 14 ğinwarda “Görgeri kiäwläre” spektakl'läre kürsäteläçäk. Ä 15 ğinwarda Läylä Däwlätovanıñ “Yäşiseñ kilep yäşä” digän kitabın täqdim itü kiçäse uzaçaq. Anda isä bik küp tanılğan cırçılarnıñ qatnaşuı kötelä.
Landış Xarrasova
