4 tapqır ütkän bu uqularğa, Bötendönya tatar kongressı başqarma komitetı wäkile Rinat Wäliullin äytüençä, çit illärdän Qazaqstan, Litva, Ukrainadan da kilep quşılğannar. Sabantuylarnı ütkärü geografiäse dä arta. 2006 yılda milli bäyräm Rusiäneñ 67 töbägendä häm 12 çit ildä ütkärelgän. Qazanda uqular ütä. Bu belem birü däresläreneñ näticäsen kem tikşerä, kem bäha quya soñ?
Bäyäne xalıq quya. 100- är, 50- är meñ keşe qatnaşqan şul uq Ul'yan, Dmitrovgrad, Samar, Sarıtawda, ä Mäskäwdä 120 meñ keşe qatnaştı. Xalıq üze bäyäne bilgeli.
di Rinat Wäliullin. Tübän Novgorodnıñ Spas rayonınnan kilgän Rämil Salixcanov, bu çarada berençe tapqır qatnaşuım. Uzem 26 altı yıl kolxoz räise bulıp eşlägändä Sabantuylarnı ütkärüneñ başında torsam da, qızığraq fikerlär, yañalıqlar äzläp kildem, di. Ämma “nijgarlılar” üzençälekle köräşlären onıtırğa telämi.
Mişär köräşeneñ bar üzençälekläre. Bezdä ayaq çäleşterü dä bar. Anda köç kenä tügel, xäylä dä kiräk. Möselman tatar keşese xäyläle dä bulırğa tieş. Tatar xalqı salım tüläp torsa da, Rusiäneñ küp töbäklärendä milli bäyrämne ütkärü öçen aqça taba almıy integä. Xakimiätlär birgäne dä “taşqa ülçim”. Bu çara byudjetqa kertelmägän. Rämil Salixcanov äytüençä, alar da bäyräm aldınnan aqçanı eşmäkärlärdän, xakimiätlärdän sorap “cıyıştıralar” ikän. Ul'yan ölkäseneñ Dmitrovgrad şähärennän kilgän Fänis Capparov ta monı iñ zur problema bularaq atadı.
200 meñ sum bezneñ öçen zur aqça. Şähär külämendä quyılmağan bit inde ul, byudjetqa kermägän. Şuñarğa kürä awırraq.
Ä menä Murmanskida isä, batırğa birer öçen täkä tabu da üze ber mäşäqät bulıp tora, di Gölcihan Sadıyqova. Udmurtiädä Apatitta sarıq üsterülären işetkäç, xäzerdän ük telefonnan şaltıratıp täkä beleşep quyğan inde ul. Alarda şähär xakimiäte birgän 25 meñneñ 10 meñe stadionğa arenda öçen kitä ikän. Bıyıl milli mädäniätlär üzäge çuaşlarnıñ “Aqatuy” bäyrämnäre belän bergä ütkäregez dip basım yasıy başlağan. Quşmıybız, di qatğıy itep Gölcihan xanım. Çönki Sabantuynıñ abruyı yıldan-yıl üsä ikän.
Urıslar sorıy. Mı dumali Sabantuy eto p'yanka. Oqazıvaetsya eto prazdnik, dilär alar. Perm ölkäseneñ Suqsun rayonındağı 4 tatar awılı älegä Sabantuynı çiratlap uzdıra. Zinaida Xösniarova äytüençä bıyıl xalıq İstäkkä cıyılaçaq. Maqsatları alğa taba här awılda da ütkärü häm at çabışların kire qaytaru. Kolxozlar tarqalıp milekne xosusıylaştıra başlağaç, tatar awılların bu yaqlarda bötenläy atsız qaldırğannar.
At çabışın bıyıl kertäbez. Awıllarda at ta kimede. Atsız qaldı tatar xalqı. Qazanda ütä torğan 4 könlek Sabantuynı oyıştıruçılarnıñ bu uquında ğalimnär, cämäğät eşlekleläre, kongress, xakimiät wäkilläre dä çığış yasıy.
Sabantuyı bäyräme ul närsäse belän ayırıla. Anda tamaşaçı da yuq, artist ta yuq. Anda qatnaşuçı ber yaqtan üze başqaruçı da, cırlawçı, biüçe häm uynawçı da häm üze tamaşaçı da.
Däwlät Şurası deputatı, yazuçı Tufan Miñnullin äytüençä, asılıbızğa qaytıp, bu Sabantuy bäyrämnäre şou-tamaşa qarawğa ğına äylänep qalmasın ide. Xalıqnı böten yarışlarda, uyınnarda qatnaştıru yulların tabır waqıt citte.
Nail Alan
