Tatarstannıñ üzeneñ milli sirkı bulırmı?

“Tatarstannıñ üzeneñ milli sirkı bulırğa tieş. Bez 31 may könne bulğan çığışıbız belän anı buldıru kiräklegeneñ ähämiäten dä dälillisebez kilä. Bu dälilläw genä tügel, ä bezneñ taläbebez dä”,- di sirk mäktäbeneñ sänğät citäkçese İldar İgumnov. Bez 5 yıl inde bu xaqta “çañ suğabız” ämma qolaq salmıylar, di ul. Rusiädäge başqa sirklar belän çağıştırğanda Qazan sirkınıñ moña böten mömkinlekläre dä bar. Berençedän,

Bezneñ sirk mäktäbendä balalar 5 yäştän alıp yuğarı professional artist bulıp citkänçegä qädär belem ala.

di sänğät citäkçese. Ä çınlıqta isä, balalar bu mäktäpne beterep Mäskäw sirk uçilişçesında uqırğa tieş. Tatarstan sirk mäktäbe bu wazifanı da üz östenä alıp menä digän itep başqarıp çığa. Raslaw öçen yıraq barası tügel, Rusiä häm Xalıqara bäygelärdä alğan lawreat diplomnarına ğına da küz salu citä. Annan da qala Qazanda belem alğan sirk ostalarına Rusiädä genä tügel, çit illärneñ iñ yaxşı sirklarında da soraw zur.

İkençedän,

Qazannı, Tatarstannı prezident, xökümät Rusiädäge iñ aldınğı töbäklärneñ berse itergä omtıla. Ä sirk sänğäte ölkäsenä kilsäk, iñ artta qalğan töbäk bez.

di İgumnov. Tamaşaçı tarixi kirmän qırıyındağı üzençälekle arxitektura binası bulğan sirkta barsı da: xaywannar da, Qazannıñ üzeneñ menä digän artistları da bar, dip uylıy. Sänğät citäkçese süzlärençä, yuridik yaqtan sirknıñ ber närsäse dä yuq. Häm alarnıñ maqsatı monnan 30 yıllar elek, Sovetlar Berlege zamannarında bulğan Qazan sirkı törkemen yañadan buldıru. Şuña kürä, fatixa alu öçen 31 may könne bulğan tamaşağa da alar Rusiä däwlät sirkınıñ elekkege başlığı, xäzerge waqıtta Rusiä mädäniät ministrlığı wäkile Lyudmila Yairovanı, kürşe-tirä sirk başlıqların häm Tatarstan mädäniät ministrlığı wäkillären çaqırğan ide. Öçençedän, Tatarstan cämäğät pulatı wäkilläre sirknıñ bu täqdimen yaqlap çıqqan inde.

Alar bezneñ repetitsiälärne qarap, şundıy yuğarı hönäri däräcädä ikänlegebezne kürep, üzebezneñ truppa bulmağanğa, üz telägebez belän genä eşlägänne kürep şaqqattı.

di sirk mäktäbe sänğät citäkçese. Sirk kiemnären äti-änilär üzläre tegä. Yaña tamaşalar quyarğa aqça yuq. Ägär milli sirk buldırıla qalsa, di İgumnov, ul waqıtta

Bez tamaşanıñ ber bülegen tulısınça milli üzençäleklärgä nigezlänep eşlär idek. Bezneñ bu eş öçen äzer qayber çığışlar da bar. Berse milli cırğa, berse “Şüräle” baletı köyenä eşlängän. Sabantuynı da nigez itep alırğa mömkin

di Tatarstannıñ atqazanğan mädäniät xezmätkäre. 31 may könne bulğan tamaşadan soñ da bu mäs'älä uñay xäl itelmäsä, tağın mondıy teläk belän tamaşalar kürsätep torunıñ kiräge bulmayaçaq. Sirk mäktäben betergän artistlarnı, mäktäptä uquçılarnıñ äti-änilären “bezneñ menä üzebezneñ milli sirkıbız bulaçaq” dip ışandırıp, bu oçraqta aldap torunıñ kiräge qalmayaçaq. Alar bezgä bütän ışanmayaçaq, di Qazan däwlät sirkınıñ Tatarstan Respublikası balalar sirk mäktäbe sänğät citäkçese İldar İgumnov.

Nail Alan.