20 iyün könne artistlar da bil alıştı. Batırğa maşina digän xäbär Saba rayonınıñ Lesxoz yanındağı Sabantuy alanına cıyılğan sänğät ähelläre arasında tiz taraldı häm köräşne tağın da qızdırıp cibärde. Çönki, üzegez belgänçä, artistlarnıñ xezmät xaqı bik az bit, dide Ğäliäskär Qamal isemendäge tatar däwlät akademiä teatrı mödire Şamil Zakirov. Xökümät başlığı urınbasarı, mädäniät ministrı Zilä Wälieva Lesxozğa şundıy büläk belän kilgän ide. Şulay itep Tatarstan artistları Sabantuyınnan milli köräştä batır qalğan Qamal teatrı artistı Minwäli Ğabdullin Çallıda cıyılğan Fiat- Albea maşinasına utırıp qaytıp kitte.
Ğäliäskär Qamal isemendäge tatar däwlät akademiä teatrı mödire Şamil Zakirov äytüençä, bıyılğı Sabantuyğa respublikanıñ barlıq tatar, urıs teatrlarınıñ artistları barsı da kilgän. Moña qädär mondıy çaralar Arçada häm Biektau rayonınıñ Äldermeş awılında da uzğan ide.
Tatar teatrların berläşterü ideyäse belän başlap cibärgän idek. Aña bıltır urıs teatrları da kilep quşıldı, dide Şamil Zakirov. Soñğı Sabantuyda törle yarışlarda, bäygelärdä Älmät teatrı, Çallı teatrınıñ ölkän artistları säxnä tele belän äytkändä, töp rol'lärdä bulğan. Ä menä arqan tartışuda Bua teatrı komandası ciñep çıqqan. Qolğağa menüdä Tübän Qamalılar berençelekne alğan. Qapçıq suğışında Älmät teatrı artistı İnzilä Nizametdinovağa tiñnär bulmağan.
Nail Alan
