Ил буйлап хакимияткә каршы арткан каршылык чараларында 75 кеше һәлак булды, йөзләрчә кеше яраланды. Протест чараларында һәлак булган кешеләр шимбә көнне Бишкәк шәһәре читендәге Сталин чоры корбаннары өчен төзелгән каберлеккә җирләнәчәк.
Кыргызстанда вакытлыча берьяклы төзелгән хакимият җитәкчеләре вакыйгаларда үлгән кешеләрнең гаиләләренә акча түләнәчәген белдерде.
Бакиев яклау көтә
Бүген Кыргызстанда элекке көннәргә караганда, тынычрак иде. Каршылыклар вакытында Бишкәктән качып киткән президент Корманбәк Бакиевның Мәскәүдән акча ярдәме таләп итүе белдерелә. Бакиев моның өчен Русиягә махсус вәкилен җибәргән.
Оппозиция яңа хакимият төзүен игълан иткәннән соң, президентны вазыйфадан чигенергә чакырды. Корманбәк Бакиев исә вазыйфадан китмәячәген белдерә.
Яңа хакимият Бакиевка каршы торган 13 оппозиция вәкиле тарафыннан төзелгән. Алар Мәскәүнең ризалыгын алуларын белдерә. Хакимиятне элекке тышкы эшләр министры Роза Отунбаева җитәкли.
Русия президенты Дмитрий Медведев "стратегик уртак" буларак Кыргызстандагы хәлләрне Мәскәүнең якыннан күзәтеп баруын әйтте.
АКШ мөнәсәбәте
АКШ дәүләт департаменты сүзчесе Филип Кроули, АКШның ике якның вәкилләре белән дә, ягъни оппозиция һәм Бакиев рәсмиләре белән тигез элемтәдә торуын белдерде.
"Президент әле вазыйфасында тора. Шул ук вакытта оппозиция тарафыннан вакытлыча төзелгән яңа хакимиятнең вазыйфага керешүе белдерелә. Без бу очракта тараф тота алмыйбыз. Безне кыргыз халкының сәламәтлеге һәм каршылыкның тыныч юллар белән чишелүе кайгырта", диде ул.
Оппозиция вәкиле Атамбаев Бакиевны биргән вәгъдәсен үтәмәүдә һәм илдә коррупция кылуда гаепләде.
Бакиев хакимияте вакытында премьер-министр булып эшләгән Атамбаев, яңа хакимият Кыргызстанда тагын бер тапкыр тоталитар режимның кайтуына юл куймаячак, дип белдерде.
Әфганстанга стратегик ярдәмнәр өчен кулланылган АКШның Манастагы хәрби базасының язмышы турында оппозиция вәкилләрендә төрле караш бар. Кыргызстан Русия белән АКШ өчен стратегик әһәмияткә ия. Чөнки бу ике илнең Кыргызстанда хәрби базалары урнашкан.
