Bu atna başında Törkiädä Yugarı Mäxkämä Fäthullah Gülänne “Teror belän köräş qanunı” nigezendä” xökemgä taru öçen säbäp tabılmadı digän näticägä kilep, anı aqlağan qarar birde. Gülän Törkiädä şäriat qanunnarın urnaştırırga tırışuda ğäyeplänä ide. Şulay itep anıñ Törkiägä kire qayta aluwı öçen ber nindi dä kirtä qalmadı. Törek justitsiäse şundıy qarar alğanda, Russiä Yugarı Mäxkämäse isä Fäthullah Gülän cämağätenä bäyle bulğan törkem häm oyışmalarnı “radikal oyışmalar” dip tıyu buyınça qarar aldı. Şul isäpkä Rusiädäge Törek mäktäpläre dä kerä.
Küptän tügel genä AQŞta “Foreign Policy” isemle kürenekle ber jurnalnıñ ütkärgän “Agımdagı iñ zur 100 intelektual” digän anketasında Gülän berençe urınnı algan ide. Bu ike uñay täräqqiätkä ber külägä, AQŞnıñ Gülängä AQŞta yäşäw röxsäte birmäyäçäge turındagı mäxkämä qararı buldı. Çönki Gülän AQŞta yäşärgä mömkinlek birgän “yäşel karta”nı alalmagac mäxkämägä möräcägät itkän, anıñ möräcägäten yaqlap Törkiäneñ elekke premierlärennän Yıldırım Akbulut, AQŞnıñ Ankaradagı ilçese dä bulğan Morton Abramoviç, AQŞ küzläw oyışması CIAneñ elekke kürenekle xezmätkärläre, AQŞ Grek provoslawları arxiepiskopı kebek 27 keşe añarga tanıqlıq birgännär ide. Inde Gülängä AQŞta yäşäw öçen ber ay waqıt qala. Wasington şuşı adımı belän Törkiädä islamçılarnıñ dulqınlanuwınamı yul açmaqçı, bilgele tügel. Çönki AQŞ ber ük dini qaraştagı AK partiäneñ yabıluwına da qarşı. AQŞ tışqı eşlär ministerlege xezmätkäre Мatt Byrza ütkän kön “mondıy ber qarar bäxetsezlek bulır ide” dip belderde. Törek kiñ küläm medyasında da Gülän kire qaytuwı İranda İslam revolutsiäsen qabızgan Xumäyni kebek me bulaçaq digän spekulatif xäbärlär çıqtı.
Mondıy spekulatsiälär çıqqaç www.herkul.org internet säxifäsendä Gülän belän ütkärelgän video intervyü. çıqtı. Zaman gazetası aşa bu intervyü barlıq mаtbugatqa taratıldı. Ul jurnalistnıñ “Sez Xumäyni kebek Törkiägä zur tantana belän kire qaytaçaqsız digän spekulatsıälär bar. Bu turıda ni äytäsez “ digän sorawına “Min İranlı tügel, vazgiätkä kürä üzem kebek tınıç qına kire qaytırmın” dip cawap qaytara. Anıñ şuşı süzläre Törkiäneñ küpçelek mätbuğat organnarında rubrika bularaq qullanıldı. Şulay da “Tercüman” gazetası “Kiläçäkme? Qaçaçaqmı?”, Cumhüriät gazetası “Gülän, AQŞta qalu öçen här törle çaranı qullana”, Radikal gazetası “Gülännän qaytu signalları kilä” kebek başqaçara eçtälektä xäbärlär çıqtı. Gülänneñ yardämçelärennän, Zaman gazetası jurnalistı Hüseyin Gülärcäneñ , Hürriyet gazetasında basılıp çıqqan süzlärenä kürä, “Tınıç ber kire qaytu buluwın hämmä keşe küräçäk. Ul üze dä ber demonstratsiä ütkärelüwen telämi.”
Zur ber dinı xäräkätneñ liderı Fäthullah Gülänneñ Törkiägä niçek kire qaytaçağı mäs`äläse küp keşeneñ diqqätendä. Çönki Törkiädä citdi ber säyäsi bilgesezlek xökem sörä. Avropa Futbol çimpionatı ramlarında ütkärelgän matçnı Törkiä Almanyaga 3-kä 2 ottırgaç, xalıqtağı futbol oyforiyası kimi töşte. Xäzer eşsezlek, säyäsi bilgesezlek, ekonomik qiyınlıqlar, häm bu turıdağı qaygılar öskä çığa başladı. AK partiä konstitutsiä mäxkämäse tarafınnan yabılamı yuq mı digän diskussiälär barğanda Fäthullah Gülänneñ Törkiägä kire qaytuwı östämä ber dulqınlanu, kierenkelek çığarmas mikän digän borçılu häm qurqular da yuq tügel. Çönki Gülän dinne tormışnıñ töp nigeze itärgä teläwen yäşermi. Bu isä rejimnıñ laisizm, dinne däwlät eşlärennän ayıru prinspına qapma qarşı, menä AK partiä östennän däwam itkän xökem protsesınıñ da töp säbäbe şul şiklänülär.
