Дини җыен сайтында язылганча, Әлбир Крганов ВГТРК җитәкчесе Олег Добродеев һәм Милләтләр эше федераль агентлыгы (ФАДН) җитәкчесе Игорь Баринов адресына "Россия 1" телеканалы эфирында "Зөлейха күзләрен ача" сериалының икенче сериясе күрсәтелүенә бәйле мөрәҗәгать җибәргән. Мөрәҗәгатьтә хәзерге Русия мөфтиләренең исемнәре сәяси тоткыннарның исемнәре сыйфатында кулланылуы һәм "мәчеттә ачыктан-ачык җенси мөнәсәбәт" күренешенә борчылу белдерелә.
"Зөләйха күзләрен ача" фильмында репрессияләнгәннәр исемлеген уку күренешендә, аерым алганда, Русия мөселманнарының Үзәк диния нәзарәте рәисе, Русиянең баш мөфтие Тәлгать Таҗетдин, Русия мөселманнары Диния нәзарәте рәисе һәм Русия мөфтиләр шурасы рәисе Равил Гайнетдин, XIX гасырның күренекле татар дин белгече Шиһабетдин Мәрҗани һәм башкаларның исемнәре яңгырый.
"Эхо Москвы" язуынча, Крганов моның өчен фильмны булдыручылар мөселман җәмәгатьчелегеннән гафу үтенергә тиеш дип саный.
Элегрәк Татарстан мөфтие Камил Сәмигуллин мәчеттә җенси мөнәсәбәт күренешләренә аңлатма биргән иде.
View this post on Instagram
Экраннарга "Зөләйха күзләрен ача" фильмы чыккач, күп кенә мөэмин-мөселманнар миңа, җенси якынлык күренеше дөрестән дә мәчет эчендә төшерелгәнме дигән борчулы сораулар белән мөрәҗәгать итә башлады. Дин кардәшләребезнең ризасызлык белдерүе аңлашыла да: мөселман дине кыйммәтләрен һәм изге урыннарга карата мондый тәртипсезлек кылу мыскыл итү, мәсхәрә булыр иде. Билгеле, моңа юл куелмады. Фильмда күрсәтелгән иске мәчет Кукмара районы Мәчкәрә авылында урнашкан. Кызганыч ки, бу мәчет бүгенге көндә гыйбадәтханә буларак эшләми һәм ул мәдәни мирас объекты булып тора. Шуңа да карамастан, район имам-мөхтәсибе, мөселман дин эшлеклесе буларак, элеккеге мәчет бинасыннан ни рәвешле файдалануын фильм төшерелә башлаганчы да, башлангач та ныклы контрольдә тотты. Моннан тыш, әдәпсезлекләр кылынмасын өчен, мәчеттә съемкаларның барышын беренче көненнән үк авылның имам-хатыйбы күзәтеп торды. Интим күренеш исә илебез тарихында дәһрилек сәясәтенең коточкыч һәм җимергеч булганын күрсәтә һәм башка мәйданчыкта ясалып картинага монтаж ярдәмендә өстәп кертелә. Сәнгать әсәрендә мондый кадрларның булуы үзен ни дәрәҗәдә аклавы — аерым сорау. Һәм аны беренче чиратта сериалны төшерүчеләргә юлларга кирәк. Мин үзем, һичшиксез, телевидение һәм башка ресурслар аша ачыктан-ачык оятсыз күренешләрне күрсәтүне әхлаксызлык һәм җирәнгеч дип саныйм. Шәхсән үземә килгәндә, татарның Зөләйха образы – ул Гаяз Исхакый тудырган образ. Һәм ул һәрвакытта рухи ныклык, гыйффәтлек, үз халкына һәм үз диненә тугрылык символы булып калачак.
A post shared by Kamil Samigullin (@kamilhazrat) on
"Мөселманнарның ризасызлыгы аңлашыла: мөселманнарның дини кыйммәтләреннән һәм изге урыннарыннан көлү — оятсызлык булыр иде. Бу хәл булмады. Районның имам-мөхтәсибе фильм Мәчкәрә авылында төшерелгәндә борынгы мәчеттә барган вазгыятьне контрольдә тотты. Ярамаган эшләр кылынмасын дип, авылның имам-хатыйбы мәчеттә дежур торды. Илебез тарихындагы денсезлек сәясәтен күрсәткән оятсыз күренеш махсус павильонда төшерелеп, монтаж белән өстәлгән", диде ул.
