Тикшерүче журналистлар Европада Русия түрәләре һәм олигархларының барлыгы 17,5 миллиард долларлык 145 активын тапкан. Бу хакта Коррупцияне һәм оештырылган җинаятьчелекне тикшеренү үзәге (OCCRP) яза, ул 24 медиа-партнеры белән "Санкцион активлар трекеры" исемле проект чыгара.
Яңа проект - "санкцияләргә эләккән Русия олигархлары, түрәләре, пропагандачылары һәм аларның туганнары белән бәйле чит ил активлары турында кайчан да булса чыгарылган мәгълүматлар базасының иң тулысы", дип ышандыра OCCRP.
Проектларының беренче этабында журналистлар, элегрәк халыкка билгеле булмаган ким дигәндә егермеләп объект тапкан.
Тикшерүчеләр мәгълүматына күрә, Русиянең элеккеге вице-премьеры, хәзерге Внешэкономбанк дәүләт корпорациясе рәисе Игорь Шуваловның улы Евгений Шуваловның, кимендә 2017 елга кадәр, Тосканада вилласы булган.
Хәзерге вакытта вилланың хуҗасы кем булуы билгелесез, әмма OCCRP искәртүенчә, күптән түгел Шувалов белән бәйле ширкәтнең шәхси очкычы Тоскана янындагы һава аланнарына рейслар ясаган.
Урта диңгез ярындагы күчемсез милекнең төгәл бәясе билгеле түгел.
Журналистлар язуынча, 2016 елда эшкуар Олег Дерипаска Кипрның Пафос утравында 650 мең долларлык вилла һәм Лимассол шәһәрендә өч миллион долларлык күчемсез милек сатып алган. Моннан тыш олигархның Люксембург шәһәрендә офис манарасын тапканнар.
Шулай ук эшкуарның Сардиния утравында гомуми бәяләрее 410 миллион долларга якын булган өч вилласы бар.
Дерипаска вәкиле әйтүенчә, эшкуарның барлык милек һәм активлары "гадел юл белән алынган", ә "сихерчеләрне аулау бары тик сәяси максатларда бара, Дерипаска аның корбаны".
Тикшерүчеләр шулай ук USM холдингы хуҗасы Алишер Усмановның 30 яшьлек икетуган энесе Сәрвәр Исмаиловның Лондонда 30,8 миллион долларлык йортын тапкан. Ә аның абыйсы Санҗар Исмаиловның 28,6 миллион долларлык йорты бар диелә.
Усмановның вәкиле икетуган энеләре күчемсез милекне миллиардерның акчаларына алмады дип белдергән. Шулай да ул Усмановның үз апасы – Гөлбахорга, ягъни Исмаиловларның әниләренә акча күчерүен раслаган, ул исә акчаларны улларын биргән булырга мөмкин диелә.
Гөлбахорның исә Хорватиядә җир кишәрлеге белән ике йорты бар, дип ышандыра OCCRP. Күчемсез милекнең якынча бәясе 5,6 миллион доллар дип бәяләнә.
Шулай ук журналистлар миллиардер Роман Абрамовичның һәм аның гаиләсенең алданрак билгеле булган активларын тапкан.
Алар арасында 2014 елның 29 декабрендә төзелгән HF Trust трасты бар, диелә "Файлы FinCEN" проектында. HF Trust документларында Абрамовичның исеме телгә алынмаган, әмма 2016 елгы документлардан өземтәләр китергәндә FinCEN Абрамович "бердәнбер бенефициар" булып тора дип ышандыра. Хәзерге хуҗасы турында әлеге вакытта мәгълүмат юк.
2015-2016 елларда HF Trust Британиянең Виргин утрауларындагы беничә ширкәткә ия булган, алар аша хедж-фондларга инвестицияләр ясалган. Ул чорда инвестицияләрнең күләме 892 миллион доллардан алып 1,3 миллиард долларга кадәр дип бәяләнгән. "Файлы FinCEN" шулай ук 2016 елда Абрамовичның Sara Trust бенефициары булуын әйтә. Бу траст берничә Кипр ширкәтенә ия булган, алар 2015-2016 елларда 304 миллион долларлык шикле трансакцияләр башкарган.
Тикшерүчеләр әйтүенчә, Абрамовичның элеккеге хатыны Иринаның һәм аларның дүрт баласының Европада биш особнягы бар. Алар арасында Лондондагы Tor Garden резиденциясендә 17,5 миллион фунт стерлинглык (23 миллион долларлык) 2021 елда сатып алынган особняк та бар диелә.
🛑 Русиядә Азатлык сайты томаланды, нишләргә? Безнең кулланма.
🌐 Безнең Telegram каналына да кушылырга онытмагыз!
