Казанның Яңа татар бистәсендә урнашкан Ак мәчетне төзекләндерергә җыеналар. Бу хакта аның имам-хатыйбы Фәрит Сәлман "Реальное время"га сөйләгән.
Сәлман сүзләренчә, мәчетне реставрацияләүгә кимендә 1,5-2 ел вакыт китәчәк.
"Инвестиция суммасы турында әйтү иртәрәк. Ахыргы бәя әлегә билгеләнмәгән, чөнки проект документларын әзерли башлаганнан соң материалларга бәяләр үзгәрде. Без бу эшкә сәдака да җыярга уйлыйбыз. Элекке елларда җәмәгатьчелек мәчетне төзекләндерү өчен берни эшләнми дип гаҗәпләнә иде. Бу катлаулы һәм тиз генә башкарылмый торган эш", дигән ул.
Ул мәчет язмышы өчен борчылучыларны төзекләндерүдә катнашырга чакыра.
Мәчетне "АРКЕШ" архитектура-реставрация бюросы берничә этапта реставрацияләячәк. Беренче чиратта аны янкормалардан азат итәчәкләр. Мәчетнең диварларын ныгытып, аны ак төскә буярга җыеналар. Гыйбадәтханә эчендә михрабны төзекләндерергә уйлыйлар. Мәчетнең дүрт өлештән торган манарасын да торгызачаклар.
Моңа кадәр татар җәмәгатьчелеге Яңа бистәдә урнашкан Ак мәчетнең ташландык хәлдә ятуын күтәреп килде. Дүрт ел элек бер төркем татар яшьләре гыйбадәтханәгә җәмәгатьчелек игътибарын җәлеп итү максатыннан ифтар оештырган иде.
Узган ел апрельдә Ак мәчеткә куркыныч янавы хәбәр ителде. Мәчеткә зыянны юл төзүчеләр китергән диелә. Эшчеләр мәчет бинасы буенда торган бетон киртәләрне салдырып, аны гыйбадәтханә диварына терәтеп куйган. Мәчетнең кирпеч диварында ярыклар барлыкка килүе ачыкланган. Моннан тыш, мәчет биләмәсендә төзелеш чүп-чары җыелган диелде.
🛑 Азатлык сайтын томаласалар, нишләргә? Бу хакта безнең кулланма.
🌐 Безнең Telegram каналына да кушылырга онытмагыз!
Форум