Согуд Гарәбстанының Җиддә шәһәрендә украин һәм американ делегацияләре арасында сөйләшүләр башланды дип хәбәр итте Украина тышкы эшләр министрлыгы.
"Украин мәнфәгатьләрен яклау, сугышны ничек тәмамлауны ачык күрү, американ партнерларыбыз белән нәтиҗәле эшләячәкбез", дип язды Украина президенты офисы башлыгы Андрей Ермак очрашу алдыннан.
Сөйләшүләрдә шулай ук Украина тышкы эшләр министры Андрей Сибига, саклану министры Рустем Умеров һәм президент офисы башлыгы урынбасары Павел Палиса катнаша. Дүшәмбе Җиддәгә шаһзадә Мөхәммәт бин Сәлмән белән очрашырга килгән Украина президенты Владимир Зеленский бүгенге сөйләшүләрдә катнашмый.
Америка делегациясенә дәүләт секретаре Марко Рубио, АКШ президентының дәүләт иминлеге киңәшчесе Мак Уолц һәм Трампның Якын Көнчыгыштагы вәкиле Стив Уиткофф кергән.
"Без Украина позициясен аңларга һәм аның никадәр чигенергә әзерлеген белергә тиеш. Чөнки ике як та чигенүләргә бармаса, сез бу утны һәм сугышны туктатуга ирешә алмаячаксыз", дип белдерде журналистларга Рубио дүшәмбе Җиддәгә барган юлда.
Bloomberg чыганаклары мәгълүматына караганда, бу атнада Уиткофф Русиядә Владимир Путин белән очрашырга җыена. Русия һәм АКШның рәсми вәкилләре бу очрашу турында белдермәде.
- 10 мартта Financial Times газеты шулай ук үз чыганакларына сылтанып язуынча, Украина вәкилләре Җиддәдәге очрашуда Русия белән атышларны өлешчә туктатып торуны тәкъдим итәчәк. Бу дроннар һәм ракетлар куллану һәм Кара диңгездә хәрби операцияләргә кагыла. Украина ягы Вашингтон күзләү мәгълүматын алмашуны һәм хәрби ярдәмне туктату карарын гамәлдән чыгарыр дип өметләнә.
- Reuters чыганаклары белдерүенчә, АКШ делегациясе әлеге сөйләшүләрне Украинаның нинди чигенүләргә бара алуын билгеләр өчен кулланачак.
🛑 Русиядә Азатлык Радиосы сайты томаланды, нишләргә? Безнең кулланма.
🌐 Безнең Telegram каналына да кушылырга онытмагыз!
