Yaña yıl bäyräme ozaq bara. Bıyıl anı dekaberneñ 25-dä başladılar, ğinwarnıñ 14-dä tügäräkläyäçäklär. Läkin dä yegerme könneñ ber öç köne tığız tantanalarğa bäylängän bula. Tatar dönyası öçen Samarda ul öç öleştän tordı dip äytep bula. “Yaqtılıq” mäktäbendä 255 mäktäp balası atna buyı sıynıflap bäyräm itsälär, dekaberneñ utızında telägän barlıq tatar balaların, äle narasıylarnı “Yaqtılıq”qa qunaqqa çaqırdılar. Bolar yä äle mäktäptä uqımıylar, yä rus mäktäplärendä uquçı tatar balaları. Bu dairä balalarnı “Yaqtılıq” mäktäbenä çaqırunıñ sere bik ğadi ide. Mömkin qädär kübräk ğailälärne “Yaqtılıq” mäktäbe belän tanıştıru. Tatar malquarları da büläklärne qızğanmağannar ide. Äytkän sıman: “Küregez, bez sezneñ çile- peşle balalarığızdan nindi telle tatar yasıybız”,- dip.
“Yaqtılıq” mäktäp uquçısı Färit Şäfiğullin “Yaña yıl” isemle cırnı başqarıp uqıtuçıların qızartmadı.
Rus mäktäplärennän kilgän tatar balaları da töşep qalğannardan tügel ide, 3-nçe sıynıf uquçısı Dilärä Sabircanova Asiä Yunıysovanıñ “ Qışnı yaratam” şiğeren söyläde. Kilgän balalar arasında cırlawçılar da bar ide.
Şulay da Samar tatarları äle telgä iğtibar birmilär. Kilgän balalarnıñ bik küpçelege şiğerlärne rusça ğına uqıdılar.
Yaña yıl bäyräme könnärendä iñ zur tantana Samar şähär administratsiäse uzdırğan Yaña yıl balı buldı. Şähärneñ iñ zamança tözelgän MTL Arena binasınıñ konsertlar zalında 500 qunaq öçen öställär äzerlängän ide. Şunısı küzgä taşlandı, bu mäcleskä şähärneñ barlıq mäktäp direktorları, yuğarı uqu yortları rektorları, baş tabiplar ide. Yaña mer qısqa ğına notıq tottı:
“Bez xalıqnıñ ışanıçın aqlarğa tieşbez. Uzğan yılnı bez xakimiätkä kildek. Läkin dä iñ awırı alda, häm bezne iñ zur eş 2007 yılnı kötä.”
Mer balına “Tuğan tel” cämğiäte direktorı, Samar şähär milli- mädäni möxtäriäte räise häm “Yaqtılıq” mäktäbe direktorı çaqırılğannar ide.
Şamil Bahautdin, Samar
