“Tuğan tel” isemle Samara ölkä tatar cämğiäte qarşında tatar ädäbiäten söyuçelär tügäräge eşli başladı. Tügäräkne canı- täne belän ädäbiätne yaratuçı, üze dä şiğerlär yazuçı Färid Şiriäzdanov citäkli. Tügäräkkä şulay qızıqlı hönär iälären çaqıralar.
“Комсомольская правда” gäcite üzeneñ öç biten Qamışlı awılına bağışlap çığardı. Qamışlını Samar ölkäsendäge keçkenä Tatarstan dip tä yörtälär. Qamışlığa nigezne 1740 yılnı Bögelmädän kilgän berniçä tatar ğailäse salğannar. Qamışlı awılı turında räsmi yazmanı ğalim Petr Pallas yazıp qaldırğan. 1768 yılnı oktäberneñ 14-dä Pallas mondıy yazma terkägän: “Soq yılğası yarlarında üskän qayınlıqlar buylap 15 çaqrım uzğaç, Qamışlı isemle tatar awılına yulıqtım. Awıl tiräsendä saf sulı çişmälär çıltırıy, läkin dä şul sularğa kükert quşıla, tatarlar bu çişmäne kükertle çişmä dilär.”
Samar ölkäsendäge Tupli awılnıñ tarixı bişençe ğasır belän bara, xalıq öç mäscedle awılı belän ğorurlana. Menä şul öç mäscedneñ berse – Qolmayır isemlesenä 100 yıl tuldı. Yubileyğa Samar gubernatorı Konstantan Titov ta kilgän ide. Gubernator mäscedkä 100 meñ sum sädaqa da birde.
Samarnıñ Alabin isemendäge töbäkne öyränü muzeyında Qazannıñ 1000 yıllığı muzeyı ber ay buyına üzeneñ 120 eksponatların kürsätte.
Samarda uzğan zur karnavalda Nailä Nasretdinova ber törkem qızlarnı tatar kiemnärenä kienderep qatnaştı häm maqtawlı urınnarnı aldı.
Samaralı Räşid Şakirov şağir Xarras Äyupnıñ “Yöräk atım” poemasın rusçağa tärcemä itte.
Samaralı Marat Safin “Ruxi säxifälär” isemle şiğri cıyentığın bastırıp çığardı.
“Yaqtılıq” mäktäbendä balalar sanı artqannan arta bara, ä mäktäptä urın citmi. Ölkä häm şähär administratsiäse 100 millionğa yaqın aqça birde häm öç qatlı yanqorma tözelä başladı. Yanqorma mäktäpneñ üzennän zurraq. Yaña mäktäpne tantanalı açu iyün ayında küzdä totıla.
Tol'yatti şähär möxtäriätenä 5 yäş tuldı. Tantana filarmonoya zalında uzdı. Säxnädän küplär çığış yasadı. Küplärneñ berse – şähär merı Nikolay Utkin da buldı. Ul üz çığışında tatarlar turında:
“ Sez- kübäw. Sez- iñ çibärläre, Sez şähärebezdä - tınıçlıq ölgese”,- dide.
Samar Cämiğ mäscedeneñ idännärenä Tacikstanda tuqılğan kelämnär cäyelde. Şulay uq Samar Cämiğ mäscedeneñ süräten töşergän namazlıqlar häm zur kelämnär tuqıldı. Teläsä kemgä büläk itärlek zatlı häm zäwıqlı sänğät äsärläre kilep çıqqan. Xäzerge waqıtta bu äle gıybadätxanägä aqça eşläw ısulı da.
Samar gubernatorınıñ Baş iqtisadçısı häm investitsiälär belgeçe Ğabibulla Xasaev milläte buyınça dağstanlı. Ul cämäğätçelek qarşında bolay digän ide:
“Bügenge köndä mädäni üzäklär cämäğätçelek fikeren tuplaw urını bulıp qala birälär. Biredä törle milli oyışmalar ber- berse belän tanışalar, yaña elemtälär, yaña mönäsäbätlär urnaştıralar. Bügenge köndä tatar milli xäräkäte, tatar milläte töbäktäge totrıqlıqnıñ bizmäne bulıp qala birä”,- dide Samar gubernatorınıñ Baş iqtisadçısı häm investitsiälär belgeçe Ğabibulla Xasaev.
Yäş belgeç, ğailä tabibı, Samar meditsina universitetı möğallime Rusiä külämendä grant otıp Amerikada belemen kamilläşterep qayttı.
Samarda mer saylawlarında “Berdäm Rossiä” firqase ottırdı. Mer känäfienä “Tormış” firqaseneñ Samar bülekçäseneñ räise Viktor Tarxov utırdı.
Sızran şähärendä ör- yaña 500 keşe namaz uqırlıq taş mäsced saldılar.
Maynıñ 22-dä Samar ölkä administratsiäse binasında illegä yaqın keşegä däwlät büläkläre tapşırıldı. Şular arasında İsmägıyl' İlgiz Kälüç tä bar ide. İlgiz Kälüç – Samar töbägeneñ 1-nçe mäşhür tatarı, texnik fännär kandidatı, Rossiä Federatsiäseneñ häm Tatarstannıñ atqazanğan mädäniät xezmätkäre 36 yıl buyına “Yalqınlı yäşlek” ansambl'neñ citäkläwçe “Duslıq” ordenına layıq buldı.
Seber tatarı , Qazan ädäbi telendä yaxşı söyläwçe polkovnik Bayäzit Kazakov Samarnıñ 43-nçe mäktäbendä 21 armiäneñ muzeyın açtı.
Yazuçı, tarix fännäre kandidatı, ataqlı millätpärwar Fäwziä Bäyrämova Samarda üzeneñ “Qırıq sırt” isemle kitabın uquçılarğa täqdim itte. Metallurglar mädäniät sarayında yözlägän keşe Fäwziä xanımnan avtograflar aldılar. Anıñ biş yözgä yaqın “Qırıq sırt”, “Tufannan yaralğan tatarlar”, “Yädernıy arxipelag”, “Bäxet açqıçı”, “Nux päygambär köymäse” isemle kitapları xalıqqa taratıldı. Fäwziä Bäyrämova çığışı xalıqqa bik oşadı.
Şamil Bahautdin, Samar
