Казанның Меңъеллык исемендәге мәдрәсәдә укучы шәкертләргә окоп шәмнәре ясатканнар. Аларны Украина сугышына җибәрәчәкләр, дип хәбәр итә Татарстан Диния нәзарәте.
Шәкертләр мәдрәсә мөдире Ильяс Җиһаншин җитәкчелегендә барлыгы 126 блиндаж (окоп) шәме ясаган. Шәм ясау өчен балавызны мәдрәсә умарталыгыннан алганнар.
Мәдрәсә мөгаллимнәре шәкертләргә окоп шәмнәренең әһәмиятен дә сөйләгән. Ул сугышчыларга "ризык җылытырга гына түгел, ә кыр шартларында җылынырга да ярдәм итәчәк", дигәннәр.
"Йөрәкләребез кушуынча үзләренең патриотик бурычларын үтәүче солдатлар һәм офицерларга безнең рухи да, матди дә ярдәм бик тә кирәк, шуңа күрә бу изге эштән читтә кала алмыйбыз", дип сөйләгән Җиһаншин.
Шәмнәр Татарстан мөфтиятенең "Зәкәт" фондына юллаганнар. Алар аны сугыш кырына юллаячак.
Моңа кадәр Меңъеллык исемендәге мәдәрәсә Украина сугышына дини китаплар һәм намазлыклар җибәргән булган.
• Русия Украинага каршы сугыш башлаган беренче көннәрдән үк Татарстан мөселманнары диния нәзарәтенең "Зәкәт" хәйрия фонды хәрбиләр өчен кирәк-ярак җыя. Моны ачык чыганаклардагы мәгълүматлар - хакимият яклы медиада, нәзарәтнең сайтында чыккан хәбәрләр раслый.
• Шул ук вакытта фонд сайтында хәрбиләргә ярдәм турында сүз юк. Монда "Зәкәт"нең халыкның иң яклаучысыз катламына ярдәм итүе генә әйтелгән: күп балалы гаиләләргә, аз керемлеләргә, авыр тормыш хәлендә калучыларга, ятимнәргә, ялгыз өлкәннәргә. Шулай ук фонд каты авыручы балаларның һәм олыларның дәвалану чыгымнарын капларга булыша.
• Былтыр апрель аенда Татарстанда республикадан Украинадагы сугышка мобилизацияләнгән хәрбиләргә ярдәм өчен "РамаZан күчтәнәче" дигән чара узган иде. Аны Татарстан мөселманнары Диния нәзарәте оештырды.
• Татарстан мөфтие Камил Сәмигуллин соңгы вакытта зур делегация белән Русия баскынлыгындагы Украина җирләренә сәфәрен ешайтты.
• Былтыр ул Украинадагы сугышта катнашучы русиялеләр "шәһит була" диде. Ислам белгече, Коръән-хафиз (Коръәнне яттан белүче) һәм Львов шәһәрендәге Кырымтатар мәдәни үзәге башлыгы Ислам Тохлу Русия хәрбиләре өчен бу сугыш — җинаять кылу дип җавап бирде.
• Сугыш башланганнан бирле Украина ягында мөселманнар кулына корал алып үз ватанын саклый. Алар арасында Украинаның элекке мөфтие, Донецки татары Сәид Исмәгыйлев ихтыяри булып үз иленең гаскәренә кушылды. Ул берничә тапкыр Русия мөселманнарына мөрәҗәгать итеп сугышка барудан качарга чакырды.
🛑 Русиядә Азатлык Радиосы сайты томаланды, нишләргә? Безнең кулланма.
🌐 Безнең Telegram каналына да кушылырга онытмагыз.
Форум