Быел Республика ифтарында Татарстан мөселманнары Диния нәзарәте корылтае җыены узачак һәм шунда ук Татарстанның яңа мөфтие сайланачак. Бу хакта "Татмедиа" дәүләт агентлыгы җиткерә.
XIII Республика ифтары 19 мартка ниятләнә. Чара "Казан-Экспо"да үтәчәк. Анда 13 мең кеше катнашырга тиеш.
"Казан-Экспо"да бу көнне Русиянең Украинага каршы сугышына багышланган күргәзмә оештырылачак. Украинадагы сугышта катнашучы хәрбиләргә ярдәм өчен акча җыю да оештырылачак.
Татарстанның хәзерге мөфтие Камил Сәмигуллинның бу вазифага килүенә быел 12 ел булачак. Диния нәзарәте рәисе вазифасына керешкәндә аңа нибары 28 яшь иде.
Соңгы тапкырында ул 2021 елның апрелендә "Казан-Экспо" мәйданында Татарстан мөселманнарының VIII корылтаенда мөфти итеп сайланган иде. Бу аның әлеге вазифага өченче мәртәбә керешүе булды.
- Русия Украинага каршы сугыш башлаганнан соң Татарстан мөфтие Камил Сәмигуллин бу һөҗүмне яклап чыккан иде.
- Соңгы вакытта Сәмигуллин зур делегация белән Русия баскынлыгындагы Украина җирләренә сәфәрен дә ешайтты. Украинаның элекке мөфтие, Донецки татары Сәид Исмәгыйлев Татарстан мөфтие Камил Сәмигуллинның Украинаның басып алынган җирләренә килүен шәригать һәм халыкара нормаларга да сыймый дип Азатлык Радиосына сөйләгән иде.
- Сәясәт белгече Руслан Айсин Татарстанга Украинаның Русия басып алган җирләренә кураторлык миссиясе йөкләнгән дип саный. Аныңча, мөфтиятнең сәфәрләрне ешайтуы шуның белән аңлатыла.
- "Бу җирләрдә Русиянең идеологик басымы Татарстан аша алып барыла, — дип саный ул. — Андагы татарлар һәм мөселман халкы белән тыгыз эшләү өчен Диния нәзарәтенең вәкилләре кулланыла. Аларга махсус ресурслар — матди һәм административ ярдәм бүлеп бирелә. Иң мөһиме — бу басып алынган җирләрдә Русия хакимияте идеологик байрагы җилфердәп торырга тиеш. Кызганычка, безнең мөфтиләребез бу эшкә җиң сызганып катнаша башлады. Гомумән, Татарстан һәм татар халкы әлеге гаделсез сугышта үзен актив катнашучы буларак күрсәтә. Әлбәттә, бу Мәскәү тарафыннан махсус эшләнелә. Шулай да, ни генә булмасын, бу татарның сәяси йөзенә зур кара тап булып төшә", дигән иде Айсин.
- Былтыр сентябрьдә Камил Сәмигуллин Украинадагы сугышта катнашучылар "шәһит була" диде. Ислам белгече, Коръән-хафиз (Коръәнне яттан белүче) һәм Львов шәһәрендәге Кырымтатар мәдәни үзәге башлыгы Ислам Тохлу Русия хәрбиләре өчен бу сугыш — җинаять кылу диде.
🛑 Русиядә Азатлык сайты томаланды, нишләргә? Безнең кулланма.
🌐 Безнең Telegram каналына да кушылырга онытмагыз!
Форум