Казанда идарәче ширкәтләр шәһәр халкын алар яши торган йортларда яшеренү урыннары булмавы турында кисәтә башлаган. 116.RU хәбәрчеләре шундый мәгълүмат язылган элмәтакталарны Идел буе һәм Вахитов районнарында очраткан.
Мәгълүмат йортка керә торган җирдә эленгән, анда өйнең идән асты яшеренү өчен туры килми дип язылган һәм якындагы имин урынның адресы бирелгән диелә.
21 декабрь көнне Казанга өч тапкыр дроннар һөҗүм итте. Нәтиҗәдә Совет, Киров һәм Идел буе районнарындагы йортлар зарарланды, корбаннар булмады.
Татарстан хакимияте Казанга барлыгы 8 дрон һөҗүме булган дип белдерде. "Аларның берсе сәнәгать ширкәтенә очкан, берсе елга өстендә үк бәреп төшерелгән, алтысы — торак йортларга һөҗүм иткән. Сәнәгать ширкәте хезмәткәрләре ышыклану урынына эвакуацияләнгән", диелә.
Ике дрон 37 катлы "Лазурные берега" торак комплексына бәрелгән иде (ул Альберт Камалиев проспектында урнашкан). Тагын бер дрон "Манһэттен" торак комплексына эләкте (ул Оренбур трактында урнашкан). Клара Цеткин урамындагы йортка исә бәреп төшерелгән дрон калдыклары килеп төште.
Шәһәр халкы яшеренү урыннарының нинди хәлдә булуына зарланды. Анда начар ис килә, кумаклар бар, пычрак диде. Казан мэры Илсур Метшин идарәче ширкәтләрне яшеренү урыннарын начар әзерләгән өчен тәнкыйтьләде.
Казан башкарма комитеты җитәкчесе урынбасары Искәндәр Гыйниятуллин исә шәһәрдә күп катлы 5971 йорт бар, аларда вакытлыча яшеренү өчен яраклы идән асларының саны - 1209 дип белдергән иде. Түрә сүзләренчә, 21 декабрьдәге һөҗүм вакытында 30 адреста яшәүче кешеләр яшеренү урыннарына керә алмаган. Алар ябык булган, ачкычларны таба алмаганнар, су тулган идән асларына керергә мәҗбүр калганнар диелде.
- Моңа кадәр Казан башкарма комитетының гражданнарны яклау идарәсе башлыгы Сергей Чанкин "берәр хәл булса, Казанда яшәүчеләрнең 82 проценты яшеренү урыннарында, 17 проценты оешмалар җирләрендәге качу урыннарында һәм 1 проценты гына метро станцияләрендә яшеренәчәк", дип әйткән иде.
- Шулай да яшеренү урыннары кешеләрне ракет һөҗүменнән озак саклый алмый. Ә атом шартлавы яки химик корал һөҗүменнән саклау турында әйтәсе дә юк, ди ул. Моның өчен качу урыннары бар, аларның күбесе совет чорында төзелгән һәм хәзер җимерек, дип аңлатты ул.
- "Кызганыч, 90нчы еллардан башлап качу урыннарын (җир астында озак вакыт яшәү өчен каралган урыннар - ред.) карап тормый башладылар. Бар да яхшы: тынычлык, дуслык, сугыш беркайчан булмас диделәр. "Махсус хәрби операция" (Украинага каршы сугышны Русиядә шулай дип атыйлар - ред.) башлангач, мондый качу урыннарына инвентаризация үткәрә башладык, шул исәптән торак кварталлардагыларына да. Тик торак кварталларда аларның күбесенә су тулган, торгызырлык түгел, оешмалардагылары гына кулланырга яраклы", дип сөйләгән иде белгеч.
- Атом коралы кулланыла калса, Татарстанда алты шәһәрне эвакуацияләргә ниятлиләр. Башка төрле куркыныч янаганда Татарстанда яшәүчеләрне идән асларына һәм метрога, яшеренү урыны буларак кулланылучы башка объектларга качырырга тиешләр.
- Моңарчы дроннар Татарстанга 5 тапкыр һөҗүм иткән иде. Иң беренче шундый һөҗүм 2 апрельдә булды: ул вакытта дроннар Алабуга белән Түбән Камадагы сәнәгать оешмаларына очып килде, шулай ук, Алабугадагы тулай-торакка һөҗүм итте. Ул вакытта 14 кеше яраланган иде.
🛑 Русиядә Азатлык Радиосы сайты томаланды, нишләргә? Безнең кулланма.
🌐 Безнең Telegram каналына да кушылырга онытмагыз!
Форум