Бүген, 18 февральдә Казанның Вахитов районы мәхкәмәсе Навальныйны искә алу чарасына килгәч тоткарланган Азат Шәеховны ун тәүлеккә сак астына җибәргән. Аны "рөхсәтсез чара оештыруда" (Административ хокук бозулар кодексының 20.2 маддәсе, 2 өлеше) гаепле дип тапканнар. Бу хакта Казан сәясәтчесе Дмитрий Румянцев үз Telegram-каналында хәбәр итте.
Моннан тыш, Шәеховка "Вконтакте"да чыгарган бер посты өчен Русия гаскәрен "кимсетү" турында да (Административ хокук бозулар кодексының 20.3.3 маддәсе) эш ачканнар.
Утырышта Шәехов мәхкәмәгә шикаять белдергән, мәхкәмә залында Татарстан тугърасы булмавын әйткән. Аның бу шикаятен кире какканнар. Шулай ук ул үзенең эшен яшәү урынындагы мәхкәмәдә карауны сораган, аның бу үтенечен дә канәгатьләндермәгәннәр.
"Хөкемдар Баязитов минем гаепсез булуым турындагы дәлилләрне тыңлап та тормады һәм 10 тәүлеккә кулга алу турында карар чыгарды. Мин моның белән килешмим һәм карарны шикаять итәчәкмен", дип сөйләгән активист утырыштан соң.
Шулай ук ул гаскәрне "кимсетү" турындагы эш белән бәйле үзенә тагын берничә тәүлек өстәргә мөмкиннәр дип саный. "Кызганыч, безнең илдә хәзер сәяси золымнар корбаннары мемориалына чәчәк салырга килгән кешене видеога төшергән өчен дә кулга ала алалар. Моны тану бик авыр", дип сөйли Шәехов.
Әмма Вахитов районы мәхкәмәсенең Шәеховка гаскәрне "кимсеткән" өчен 45 мең сум җәза бирүе хәбәр ителде.
16 февральдә Навальрныйның үлүенә бер ел узу уңаеннан узган чараларда Башкортстан белән Татарстанда да берничә кеше тоткарланган иде. Уфада тоткарланучыларны беркетмә төземи генә кире җибәргәннәр. Ә Казанда тоткарланган өч кешегә мәхкәмәләр булачагы әйтелде. Тоткарланган тагын ике кешенең исемнәре - Андрей Тимонин белән Радик Хәмидуллин. Өчесен дә Казанның "Япеев" полиция бүлегенә алып киткән булганнар.
Бүген Вахитов районы мәхкәмәсе Тимонин белән Хәмидуллинга ачылган административ эшләрне дә караячак. Аларны "киңкүләм чара оештыру кагыйдәләрен бозуда" (Административ хокук бозулар кодексының 20.2 маддәсе) гаеплиләр.
- 16 февральдә дөньяда һәм Русиянең төрле шәһәрләрендә оппозиционер сәясәтче Алексей Навальныйны аны искә алу чаралары узды. Алар арасында чиркәүләрдә дога кылулар, "Навальный" фильмнарын күрсәтүләр, сәясәтченең "Патриот" китабын укулар, сәяси тоткыннарга хатлар язу кичәләре һәм башка чаралар бар иде. Сәяси чикләүләр шартларында Русия шәһәрләрендә активистлар сәяси золым корбаннары һәйкәлләре янына чәчәкләр алып килде.
- Алексей Навальный 2024 елның 16 февралендә Ямал-Ненец автоном бүлгесенең Харп шәһәрендә, "Полярный волк" колониясендә үлде. Хатыны һәм көрәштәшләре сәясәтчене Владимир Путин боерыгы белән үтерделәр дигән фикердә. Кремль моны кире кага.
- Навальный оештырган Коррупциягә каршы көрәш фондын һәм Навальный штабларын Русия хакимиятләре экстремист оешмалар дип таныды. Русия кануннарына ярашлы, мондый оешмалар белән хезмәттәшлек иткән өчен җинаять җаваплылыгына тарталар.
- Тикшеренүчеләр һәм журналистлар Навальный үлеменә бәйле тикшерү алып баруларын әйтәләр, әлегә зур нәтиҗәләр турында хәбәр ителми. The Insider басмасы Алексей Навальный төрмәдә агуланган булуы ихтимал дип язып чыкты.
🛑 Русиядә Азатлык сайты томаланды, нишләргә? Безнең кулланма.
🌐 Безнең Telegram каналына да кушылырга онытмагыз!
Форум