Татарстанда яшәүчеләр Украинага каршы һөҗүмдә катнашучы хәрбиләргә барлыгы 668 мылтык тапшырган. Бу хакта Татарстан Росгвардиясенең корал әйләнеше контроле бүлекчәсе җитәкчесе урынбасары Рамил Камалиев әйтте, дип җиткерә "Татар-Информ".
"Махсус хәрби операциядәге сугышчыларга мылтык тапшыр" дигән чара кысаларында республиканың 556 аучысы коралын китереп биргән.
Коралны куллану һәм саклауга рөхсәт вакыты чыккан булса да, кеше мылтыгын сугышчыларга тапшыра икән, аны административ җаваплыктан азат итәләр дип сөйләгән Камалиев.
Хәбәрдә әйтелгәнчә, шома көпшәле кораллар пилотсыз очкычлар һәм дроннарга каршы куллану өчен кирәк.
2024 елның маеннан декабренә кадәр русияләр "махсус хәрби операция ихтыяҗлары өчен" (Украинага һөҗүмне Русия хакимиятләре шулай дип атый — ред.) үзләренең 4,3 меңнән артык шәхси коралын тапшырган. Сугышка кешеләрнең үзләре теләп биргән коралларын гына түгел, канунсыз корал саклаучылардан тартып алынганнарын да, шулай ук кирәкмәгәннәрен дә җибәрәләр — алар келәтләрдә ята, дип язган иде "Вёрстка".
Былтыр октябрь аенда Росгвардия корал әйләнеше өлкәсендә авыр булмаган хокук бозулар кылучыларга "амнистия" игълан иткән иде. Әгәр бу кешеләр коралларын "махсус хәрби операция ихтыяҗларына" тапшырса, аларны җаваплылыктан азат итәчәкләре әйтелде. Бу хәлдән соң фронтка җибәрелгән коралларның саны ике тапкырга диярлек арткан.
Былтыр август аенда Башкортстанның Сибай шәһәре хакимият башлыгы Азамат Юлдашбаев Украинага һөҗүмдә катнашучы хәрбиләргә җибәрү өчен халыктан утлы корал җыя башлаган иде. "Сугышчыларыбыз сораганга, сивил кулланылыштагы шома көпшәле коралларны җыюны игълан итәбез (күп зарядлы мылтык, карабиннар). 12 калибрлы булса әйбәт, аларга ядрәләр дә кирәк", дип мөрәҗәгать итте ул халыкка. Түрә әйтүенчә, бу корал пилотсыз очкычларга каршы нәтиҗәле кулланыла.
- Русиядә сугышка киткән ирләрне матди-техник яктан начар тәэмин итүләренә дәлилләр шактый булды. Мобилизация вакытында да алар экипировканы үз акчаларына сатып алырга кушуларыннан зарланды, ятаклары да булмаган казармаларның видеоларын төшерде, тутыккан корал бирүләре турында сөйләде.
- Күптән түгел пропагандачы Александр Сладков та сугыш башында Русия гаскәрләренең начар тәэмин ителгән булуын сөйләде. Русияләр аннан-моннан бирелгән хәрби киемнәр һәм иске каскалар киеп, Икенче дөнья сугышыннан калган өч сызыклы винтовкалар (Мосин винтовкалары) тотып сугышкан иде, дип сөйләгән иде ул.
- Хәрбиләрне, шул исәптән мобилизацияләнүчеләрне тәэмин итү Русия саклану министрлыгына карый. Моны муниципалитетларга төшерү Конституциягә каршы килә ди Transparency International оешмасының Русия бүлеге җитәкчесе Илья Шуманов.
- Русия түрәләре "армия тиешенчә тәэмин ителгән" дип кабатлап тора. Ә халык сугышка киткәннәргә һуманитар ярдәм җыеп җибәреп торудан туктамый: эчке киемнәрдән алып, бронежилетларга кадәр җыялар. Хәтта мәктәп укучыларын да ятьмәләр бәйләргә җәлеп иттеләр.
- Күптән түгел Казанда мәдрәсә шәкертләренә окоп шәмнәре ясатканнар иде.
🛑 Русиядә Азатлык Радиосы сайты томаланды, нишләргә? Безнең кулланма.
🌐 Безнең Telegram каналына да кушылырга онытмагыз!
Форум