Newsweek: дөньяның иң яхшы иле – Финляндия

Бу исемлекне төзегәндә белгечләр илләрне биш төрле яклап тикшергән: мәгариф, сәламәтлек саклау өлкәсе, яшәү шартлары, икътисад торышы һәм сәяси мохит. Һәр тармактагы баллар кушылып, гомум урын чыгарылган.

Мисал өчен, дөньяның иң яхшы иле дип табылган Финляндиянең күрсәткечләре мондый:

• мәгариф – 100 балл (халыкның 100%ты укымышлы, уртача уку дәвере 17 ел)
• сәламәтлек – 90 балл (уртача гомер озынлыгы 72 ел)
• яшәү шартлары – 91 балл (уртача керем $45,700, керемнәр аермасы 27%, уртача куллану күләме $25,300, эшсезлек 8.5%)
• икътисади әүземлек – 70 балл (яңа кәсеп ачу өчен 14 көн җитә)
• сәяси мохит – 92 балл (Freedom House бәяләмәсе – 1.0)

Чагыштыру өчен, Русиянең күрсәткечләре:

• мәгариф – 88 балл (халыкның 99.4%-ты укымышлы, уртача уку дәвере 13.6 ел)
• сәламәтлек – 61 балл (уртача гомер озынлыгы 60 ел)
• яшәү шартлары – 68 балл (уртача керем $9,370, керемнәр аермасы 37.5%, уртача куллану күләме $5,326, эшсезлек 8.9%)
• икътисади әүземлек – 50 балл (яңа кәсеп ачу өчен 30 көн кирәк)
• сәяси мохит – 47 балл (Freedom House бәяләмәсе – 5.5)

Шушы күрсәткечләр белән Русия 100 ил арасында 51нче урында.

Беренче унлыкта тагын Австралия, Люксембург, Норвегия, Канада, Нидерланд, Япония һәм Дания. АКШ 11нче, Германия – 12нче урында.

Тармаклап караганда, Newsweek белгечләре фикеренчә, иң яхшы мәгариф – Финляндиядә , сәламәтлек саклау системы – Япониядә, яшәү шартлары – Норвегиядә. Икътисад әүземлеге ягыннан Сингапур алда бара, иң яхшы сәяси мохит – Швециядә.

Башка илләрнең күрсәткечләрен Newsweek журналының интерактив җәдвәлендә күреп була.