Татар-Информның татар редакциясе һәм Интертат сайтының баш мөхәррире Рәмис Латыйпов вазифасыннан киткән. Бу хакта ул Вконтакте сәхифәсендә хәбәр итте.
Латыйпов эштән китүнең сәбәбен аңлатмый, шул ук вакытта яңа эшкә дә күчми.
— Кая китәсең дип сораучыларга – мин ниндидер икенче урынга күченмим, яңа эш урыным юк. Әлегә ял итәм, редактор булып эшләү сәбәпле тормышка ашыра алмаган хыялларымны тормышка ашырырга уйлыйм, аннары күз күрер әле, — дип язган ул.
Рәмис Латыйпов үз вазифасыннан урыс милләтчеләре һәм Z-блогерлар арасында зур-шау тудырган интервьюдан соң китә. Узган атнада Татар-Информда аның Русия мөселманнары Диния нәзарәте рәисе урынбасары Дамир Мөхетдинов белән әңгәмәсе чыкты.
Карагруһ активистлар Мөхетдиновны русофобиядә һәм пантюркизмда, Алтын Урда тарихын алга сөрүдә гаепләде.
Рәмис Латыйпов интервьюны Дамир Мөхетдиновның эш бүлмәсендә алган. Анда Калка сугышы күренеше ясалган картина күренә. Бу 1223 елда монголларның Калка елгасы буенда урыс-кыпчак гаскәрләрен тар-мар итүен тасвирлый. Ул хәзерге Украина территориясендә — Донецки өлкәсенә якын җирдә узган. Нәкъ менә бу күренеш тә урыс милләтчеләренең аеруча ачуын чыгарды һәм Мөхетдиновка һөҗүм башлауга сәбәп булды. Мөфти картинаны алыштырырга мәҗбүр булды.
Рәмис Латыйпов Татар-Информның татар редакциясендә һәм Интертат сайтында 2016 елның июненнән башлап эшләде. Ул җитәкләгән редакция шулай атналык басма газет та чыгара. Интертатны укучылар саны татар телле сайтлар арасында иң күбе.
Латыйпов шулай ук социаль челтәрләрдә кыю гына фикерләр дә әйтеп тора, татар театрларында куелган спектакльләргә рецензияләр яза.
2024 елда Татарстанда зур тоткаларулар — Энгел Фәттахов һәм Раил Садриевның кулга алуына үз фикерен белдерде. Латыйпов моны "дошман эзләү шаукымы" бара дип атады.
🛑 Русиядә Азатлык Радиосы сайты томаланды, нишләргә? Безнең кулланма.
🌐 Безнең Telegram каналына да кушылырга онытмагыз.
Форум