Татарстаннан мобилизациянеп, Украина сугышына җибәрелгән хәрбиләрнең кимендә 533е һәлак булган. Бу хакта сугыш башыннан бирле Украинага китеп, анда үлгән русияләр турында мәгълүмат җыючы Медиазона проекты хисабыннан күренә. Соңгы яңартуга кадәр мондый хәрбиләр саны 500дән ким иде.
Бу күрсәткеч белән Татарстан хисапта икенче урында бара. Иң күп мобилизациянүче хәрби үлгән төбәк – Башкортстан. Анда журналистлар кимендә 583 мобилизациягә эләгүче үлемен турында мәгълүмат тапкан.
Өченче урында – Свердлау өлкәсе (кимендә 476), дүртенче урында – Бурятия (423) бара.
Медиазона журналистлары BBC-ның урыс хезмәте белән берлектә сугышта үлүчеләр исемлеген ачык чыганакларга нигезләнеп җыя. Хакимият үлүчеләр турында чын саннарны бирми, алар күпкә зуррак булырга мөмкин.
Исемлектә гомум үлүчеләр саны белән дә Башкортстан һәм Татарстан беренче ике урында бара.
Татарстан һәм Башкортстаннан сугышка китеп үлүчеләр турында үз хисабын Азатлык радиосы да алып бара. Бүгенге көндә Башкортстаннан кимендә 4584 кеше, Татарстаннан кимендә 4103 кеше үлеме турында мәгълүмат табып булды.
Соңгы арада хакимият тарафыннан һәлак булучыларның статусларын яшерү сәбәпле, алар арасында күпме мобилизацияләнүгә эләгүче турында мәгълүмат тулы түгел.
- 2022 елның 21 сентябрендә Русия президенты Владимир Путин илдә "өлешчә мобилизация" игълан итте.
- Татарстаннан күпме кеше мобилизацияләнгән дигән саннар рәсми чыкмады. Башта үз чыганакларына сылтама белән "Бизнес Online" 21 сентябрьдә Татарстанга 10 мең кеше тупларга дигән бурыч куелган булган дип язды. Шулай да соңрак планны 3 мең кешегә калдырганнар диелде.
- Басма чыганаклары Казанда 950дән артык кеше мобилизацияләнүен әйтте, башта ике меңләп кеше җибәрергә тиеш булганнар диелә. Казан мэриясе мәгълүматына караганда, шәһәрдән барлыгы 800дән артык кеше мобилизацияләнгән. Шулай ук Чаллы мэры Наил Мәһдиев шәһәрдән 1200 кеше чакырыла дигән иде.
🛑 Русиядә Азатлык сайты томаланды, нишләргә? Безнең кулланма.
🌐 Безнең Telegram каналына да кушылырга онытмагыз!
Форум