Bäyrämnär härwaqıt diärlek mädäni çaralarnı kütärep cibärälär, bigräktä Yaña yıl belän bäylängännäre. Çırşılarnıñ nindie genä uzdırılmıy?! Nänilär öçen, mäktäp uquçıları öçen, studentlar öçen, törle millät wäkilläre öçen. Menä Duslıq yortında uzğan mäcleslärneñ berse – yäşlärebezneñ yäş tatar eşquarları belän oçraşuı buldı. Bu mäcles hiç kenä dä şaw küñel açuğa qorılmağan ide. Yäşlärneñ Yaña yıl kiçäse milli xäräkättäge törle buınnarnı, törle sotsial' qatlam şäxeslären millät mänfäğäten qayğırtudağı mäşäqätlärne urtaq cilkägä salu ber bulsa, yäşlärebezneñ intellektual' köçlären tatar malquarları üz tarmaqlarında qullana ala alalarmı?- digän soraw da quyılğan ide.
Oçraşuğa kilgän utızğa yaqın yeget häm qız nindi genä hönär iäläre tügel! Muzıka uqıtuçısı, möğallimä, tözüçe, informatika uqıtuçısı, säwdä xezmätkäre, energetik, ğäskär xezmäten ütäp qaytuçılar, maşinist, traktorçı, fizika- matematika fännäre kandidatı, mexmat tämamlap programmalar belgeçe bulıp eşläwçe, bulaçaq tabiplar… Hönärläre törle bulsa da kiçägä kilüçelär arasında tögäl fännär belän şöğellänüçelär kübräk. Menä şul törle hönär iälären berläştergän närsä - ul tatar sänğäte, tatar ruxı, tatar bulıp qalu teläge.
Pedagogiä universitetınıñ öçençe kursında uquçı Gölfiä tutaşnıñ ostalığı könnän- kön üsä. Monı min anıñ äle näni balalar belän şöğellänüe belän dä bäylängän dip uylıym. Balalarnı öyrätä - öyrätä Gölfiä üze dä sizmästän cır, süz sänğätendä kamilläşä bara. Yäşlärneñ cır belän yänäşä biergä ostalıqları da kürenep tora. Aerokosmik universitet studentı Tälğät oyıştıruçı bieklegendä genä qalmıyça şäxsi sıyfatların çarlıy- çarlıy cırçı ostalığın üzläşterde, inde tel baylığın da buldıra başlağan.
Färid Şäfiğullin küz östendä qaş bulıp üsä. Küz genä timäsen dä, yoldızlıq çire elägä genä kürmäsen. Köye dä bar, cırlıy da belä, säxnädä üzen tota da belä. Äti- änisenä räxmät. Färidne milli tösmerlär östäp kienderä dä belälär. Çın milli sänğät'neñ komponentı bulğan närsä- ul kiem dä äle.
Öç distä yeget- qıznı berläştergän närsä tatar ruxı bulsa, alarnı daimi sänğät bocrasında totuçı keşe- ul Albina Mäxmütova. Xoday Täğälä büläk itkän ostalıq, sabırlıq östenä ğailädä uñğanlıq sıyfatı östälgän bulğanğa , Albina tınıç liderğa äylände. Aña qarap millätebezneñ yegerme berençe ğasırda yäşägän tatar tutaşın yasar idem min, äsärdä rässam bulsam.
Milli xäräkättä yä ire, yä xatını ğına qatnaşa. Küp oçraqta millätpärvarlıknı añlamağan xatınnar belän iza çigälär irlär. Samar tatar milli xäräkätendä parlı, irle- xatınlı tatar öçen can birüçelär barmaq belän sanap çığarlıq. Roza häm İrek Kärimovlar, Daniä häm Äxmät Nafiginnar, Albina häm Färhäd Mäxmütovlar – bu bezneñ bäxetebez. Duslıq yortında tatar yäşlären Färhäd üz tiräsenä cıya aldı.
Äye, yäşlärebezneñ tatar cırların cırlawları- matur küreneş, watıp- sındırıp bulsa da tatarça söyläşüläre ömet tudıra. Üz- ara duslaşa belüläre millätneñ izge sıyfatın surätli. Ä iñ möhime- yäşlär biredä üz tiñnären tabalar, tatar ğailäsen qoralar, tatarnı däwamlı itälär.
Duslıq yortında uzğan yäşlär kiçäsendä yäş eşquarlarıbıznıñ da qunaq buluları tuğanlıq ceplären nığıttı, mönäsäbätlär urnaştı.
Mäclesne tügäräkläp Samar şähäreneñ tatar milli- mädäni möxtäriäte citäkçese Cämil Väliullin bolay dide:
“ Bügen yäşlär belän oçraşuda şuña inandım, bezgä xristian dine dä kerä almas, telebezne dä beterä almaslar. Yäşlärebez bezneñ fundamentıbız, altınnarıbız. İnşalla, şulay bergä cıyılıp berläşsäk, bezgä räxätlänep torırğa ğına qala. Min äle genä “Yalqınlı yäşlek” ansambleneñ konsertın qaradım. Üzebezneñ İlhamnar, Älfiälär, Salawatlar, Aydarlar, Xäniälär üsä. Cırçılarıbıznıñ ostalıqları könnän- kön kamilläşä. Bolar barçası da küñellärebezne kütärerlek xällär. İlgiz Kälüç talantlarnı üsterep tora, aña oluğ räxmätebez. Bez olığayıp barabız, bezne almaştırırlıq yäşlär üsep kilüenä quanabız.”
Şamil Bahautdin, Samar
