Samarnıñ Baş mäscede yustitsiä orğannarında 30- nçı mäxällä bulıp terkälgän. Menä şunda isäp- xisap cıyılışı uzdı. Aldan uq tınıçlandıram. Söyläşü ğäcäyep tınıç uzdı, läkin dä kritika digän “borıçlı” süzlär yañğıradı.
Färid Äyupov çığışınnan özek:
“ Nur mädräsäseneñ tübäse kapital' remont alğan, xatın- qızlarnıñ bädräfenä evroremont yasalğan. Rädcäp Nasretdin citäkçelegendä eşçelär Cämiğ mäscedenä könçığış bizägen östäp ‘ğıybadatxanäbezne izgelek belän maturayttılar. Rädcäp äfände Sankt- Peterburg qalasında sänğät akademiäsen tämamlağan rässam- restavrator.
Mäscedtäge 204 täräzä tulısınça yañadan eşlände, 204 täräzä 1600 kvadrat metr digän süz bit. Tözüçelär ike ay yarım waqıt eçendä sıyfatlı eş başqardılar.
Mäscedtä, çın mäğnäsendä, zıyalı qartlar eşli. Alar- Tahir Mamıyşev, Ğosman Sadretdinov, Xaris Ğalyaletdinov, Ğomär Bahautdinov häm başqalar. Mäsced eçendäge 167 cılıtu batareyaları sütelep yudırtıldı. Mäsced gektar yarım cirne biläp tora, şunda 70 töp qara häm qızıl miläşlär, 58 töp almağaç, 70 töp şomırt, 24 zäñgärsu çırşılar utırtılğan.”
Xucalıq buyınça cawaplılar maturlıq, yäşellek, tonna, sum, kvadrat metrlar turında söyläsälär, Baş imam İrşat Safin mäs’äläne mögezennän alıp sırtına saldı. Anıñ fikerençä, “imamnar bügen kön taläplärenä turı kiterep eşlämilär, yäşlär belän tığız elemtädä eşläwçelär yuq, nol'! Bik ükeneçle xäl. Samarda altı ğıybadatxanä eşläp torğanda ike möselman bändäsen xizbutçılar möheren çäpäp zindanğa utırttılar. Tatar milli xäräkäte citäkçeläre çuqındıru säyäsätenä qarşı çıqqanda, imzalar quyıp yuğarı dairädäge citäkçelärgä möräcäğät itkändä imamnar posıp yatalar. Ä bit Cämiğ mäscede ideologik lokomotiv bulırğa tieş! Qayda bezneñ intelligentsiä, nigä tatar zıyalıları mäscedkä yöremi? Mäsced belän intelligentsiä arasında buşlıq. Rus uqıtuçıları çirkäwgä yögerep baralar, ä tatar uqıtuçıların mäzscedkä tartıp kiterep bulmıy”,- dide İrşat Safin.
Äüxädetdin xäzrät Kanyukaev fikere:
“Pravoslav kul'turası kitabınıñ unınçı bitendä: “Bibliä- samaya glavnaya kniğa”- dip yazılğan. Köpä- köndez balalarnı çuqındırırğa cıyınalar.
Cämil Wäliullin fikere:
“Yaxşılap eşlär öçen här ğailägä “Berdämlek”, “Azan”, “Säläm” gäcitlären aldırırğa, “Aq bäxet”, “Azatlıq” tapşıruların tıñlarğa. Milli xis tä, dini wäğäz dä küktän töşmi. Anı alır öçen beraz köç quyarğa kiräk.”
Läkin dä isäp- xisap cıyılışında Wağiz xäzrät Yarullinnıñ: “Min möftilektän kitäm”,- diyue, ayaz köndä yäşen bulıp yañğıradı.
Şamil Bahautdin, Samar.
