Samar töbägendä här zur awılda tatar üzeşçän sänğät kollektivı eşläp kilä. Ä menä şul küplär arasında İske Yärmäk awılı ayırılıp tora. İske Yärmäktä 35 yıl buyına ataqlı “Aq qayın” üzeneñ yañadan- yaña programmaları belän tamaşaçını quandırıp kilä. Soñğı yıllarda bu icat törkeme üzenä almaş äzerli başladı. Qulğa- qul totınıp, iñgä- iñ terälep ike kollektiv tatar cır sänğäten saqlap kilälär. kollektiv ike, läkin dä citäkçeläre ber- ul Ğamil Ğaliullin.
Ğamil äfände ğomereneñ 41 yılın sänğät'kä bağışlağan şäxes, armıy- talmıy tatar moñ çişmäsen saqlıy, almaş äzerläw belän mäşgul'.
Ğamil äfände, ansambl'neñ yäşlär törkemen festival'lärgä çığarğanıñ yuqmı äle?
Äye, soñğı waqıtta balalar törkemen dönyağa çığarırğa köç quyam. Almaş digän närsäne waqıtında äzerlärgä kiräk bit. Samar ölkäsendä “Xalıq cır sänğäte” isemle konkurs uzdırıla. Menä öç yıl inde balalarnı şul bäygegä alıp kiläm. Öç yıl buyına keçe törkem lawreat isemen alıp qayta.
Soñğı märtäbä qayda çığış yasadığız?
Aprel'neñ unsigezendä Samaranıñ ölkä xalıq icatı yortında zur festival'dä qatnaştıq. Bu bäygedä 14 yäştän alıp 21 yäşkä qädärlelär köç sınaştı. Ölkä buylap 35 kollektiv cıyılğan ide. Menä şul 35 törkem arasında “Aq qayın” balalar törkeme ikençe urınğa layıq buldılar.
Nindi cırlar, iyüllär belän yaltıradığız?
Tik xalıq cırları, tik xalıq iyülläre genä buldı.
Ayırım cırçılar üzlären kürsätä aldılarmı?
Bäygegä 14 bala alıp kilgän idem. Läkin dä törkemdä qalquçılar buldı. Alar- Qatya Kasimova, Ğaliä Tacetdinova, Azaliä Bädretdinova. Balalar tırışalar.
Yärmäkneñ sänğät'täge yöze berniçä. Şularnıñ berse- Ğali garmunı. Ğali ğarmunın yegetlär qulında kürep bulamı?
Bik sälätle yegetebez üsep kilä. Abıysı Ramil Qazanda mädäniät akademiäsendä belem ala. Bu ğailä ğomumän- sänğät oyası. Ätiläre garmunda uynıy, äniläre cırlıy.
Yaqındağı plannar?
İyünneñ başında İske Yärmäktä Sabantuy, iyünneñ 24-dä zur törkem yasap Samar Sabantuyına kilergä isäp.
Şamil Bahautdin, Samar
