Möftiätneñ çirattağı plenumı uzdı. Kön tärtibendä unğa yaqın mäs'älä qaraldı. Läkin dä iñ möhimnäre tübändägelär. Samarnıñ Zubçaninovqa bistäsendä mäçet salınaçaq. Tatarnıñ izge eşquarları da yärdämnären wäğdä itälär. Bu zur çığımnar taläp itkän tözeleş xalıq yärdämenä moxtac bulaçaq.
Soñğı yıllardağı tormış taläbennän çığıp möher häm imza mäxällälärdä räis qulına küçä. Şul uq waqıtta xäzrätlärebez ğäybättän dä azat itelälär. Çınında isä bu ölkä öçen yañalıq tügel. Şul ısul belän Tupli awlında inde eşlilär, bu yañalıq plenumğa qädär ük Yaña Yärmäktä dä kertelgän bulğan.
İke yıl kontrakt sistemasın kertergä dip qarar qabul itelgän bulsa da haman da tormışqa aşıra almağan bulğannar. Bu “iske” qararnı yañadan “yañarttılar”. Ölkädäge barlıq imamnar, räislär,mäzinnär eşkä kontrakt buyınça alınaçaqlar.
Samar Cämiğ mäçeteneñ xezmätkäre Minnäxmät Sägıyrev äytüençä, bu Rossiä qanunnarına qarşı kilmi ikän.
Awllardağı mäçetlärdä cıyılışlarda imam,räis, mäzinne täqdim itäçäklär, ä Baş möfti soñğı süzne äytäçäk.
Bügenge köndä zindannarda küp möselman bändäläre utıra. Bu tarmaqta cawaplı itep Äüxädetdin xäzrät Kanyukaev bilgelände.
Yäşlärebezneñ kübese telsez dä, dinsez dä. Näq menä şul açı çınbarlıqnı isäpkä alıp, dini tärbiäwi eşebezne bolğar babalarıbızdan kilgän ğöref- ğädätlärebezgä tayanıp eşläwne küzdä totıp yäş xatın- qızlar belän eşläw öçen cawaplı itep Saniä xanım Minaçeva quyıldı.
Möftiätneñ barlıq eşläre belän yaña keşe citäkçelek itäçäk xäzer, ul Samar şähär milli- mädäni möxtäriäte räise Cämil Väliullin.
Plenum eşe turında fikerlär:
Baş möfti Wağiz Yärullin: “Cämil Wäliullin küp yıllar dinebez islamğa xezmät itä. Öç märtäbä xaci. Eşquarlar belän tığız elemtädä yäşi. Şähär häm ölkä citäkçeläre belän yaxşı mönäsäbättä, türälärgä süze citä. Bertawıştan baş idäräçe itep saylandı.”
Samar Cämiğ mäçeteneñ räise Färid Äyupov: “Kiñäşep eşlibez. Tınıç fiker uylanuğa säbäpçe bula. Plenumda tınıç fiker alışu eşlekle täqdimnärgä kiterde. Kontrakt – eşne tärtipkä salu ul. Elek yılına 3-4 mäçet salınsa, soñğı waqıtta tözeleşlär kübäyde. Kontrakt sıyfatnı kütäräçäk.”
Baş imam İrşat Safin: “Päygambärebezneñ äytkän süze bar. Möselman ber yılan tişegenä ike märtäbä tığılmıy. Plenumda süzlär dä uylanıp söylände, täqdimnär dä uylanıp äytelde. Qararlar näticäle. Şähär möxtäriäte citäkçeseneñ dini eşkä kerep kitüe maqtawğa layıq. Elek tä alar parallel' baralar ide, xäzer inde möxtäriät citäkçese dini tormışnıñ eçendä qaynayaçaq. Eş barsın disäk, buysına belergä kiräk. Kontrakt buysınırğa öyrätäçäk.”
Şamil Bahautdin, Samar
