“Tuğan tel” isemle Samara ölkä tatar cämğiäte üzeneñ öç yılğa ber bula torğan isäp- xisap cıyılışın uzdırdı. Samar Duslıq yortınıñ aktlar zalında törle yäştäge irlär häm xatınnar,yegetlär häm tutaşlar, zur eşquarlar öç säğät buyına tatar yazmışı turında süz alıp bardılar kön tärtibenä cide mäs'älä quyılğan ide. Töp doklad belän cämğiätneñ direktorı çığış yasadı. Menä şul dokladtan ayırım fikerlär:
“Bıyıl Samardağı “Yaqtılıq” mäktäbenä 10 yıl bula. 170 baladan başlanğan mäktäptä bügen 255 uquçı, häm uqırğa teläwçelär arta bara, çönki tatar balalarınnan ğına tuplanğan mäktäptä tärtip yaxşı, ä tärtip bulğan cirdä ğilemlek yaxşı señä. “Yaqtılıq”qa yanqorma tözelep betep yata, häm bu tözeleş 100 mlnğa töşte. Sentäber başına binanı ölgerter öçen tağın 36 mln sum aqça kiräk. Cämğiätneñ prezidentı Änwär Bul'xin gubernator Konstantin Titov belän oçraşıp bu problemanı xäl itärgä alındı.
Samarda här yılnı şähärneñ iñ zur sport Sarayında Näwrüz bäyräme uzdırıla, ä Näwrüzdäge köräştä tik 18 yäşkä qadär yegetlär genä qatnaşalar. Tatar baylarınıñ zur büläkläre kübesençä rus häm ärmän yegetläreneñ qulına elägä. Qarar çığarıldı, tatar awıllarındağı mäktäplärdä, şähärlärdä grek- rim köräşe seksiälärendä yegetlärne köräşergä öyrätergä, çönki grek- rim köräşen üzläştergän bala tiz tatar köräşenä küçä ala.
Samar ölkäsendä tatar sänğät köçläre üseştä. Sızran şähärendä matur ğına cır kollektivı tuplandı, Neftegorsk şähärendä dä “Duslıq” cämğiäte tergäklänep kilä.
“Yäşlärne üsterergä kiräk!”- digän süzlär yış yañğırıy. Moña qarşı cämğiät direktorınıñ cawabı da altmış keşeneñ härbersen siskändererlek ide: “Öegezdä balalarığız häm onıqlarığız tatarça söyläşälärme häm alarğa tatarğa ğorurlığı señderelgänme? Härberebez ğailädä şul eşne başqarsaq, almaş bulaçaq!”
Şulay uq Samardağı “Azan”, “Berdämlek”, ”Säläm” gäcitälärendä islam äxlağın propagandalaunı da möhim çara ikänen iskä töşerde direktor.
Samara ölkäseneñ Denis awılında Nursinä Xäkimova - iñ aktiv xäbär yazuçı. Nursinä xanım Qazanda çığa torğan barlıq gäcitä- curnallarnı yazdırıp ala. Maqsat quyıldı. Här awlda şundıy Nursinälär bulırğa tieş.
Samar Näwrüzenä Tatarstan kitap näşriätеn çaqıru da, maşina-maşina tatar kitabın satu da matur küreneş dip bäyälände.
Milli xäräkät yulbaşçıları tırışlığı arqasında “Berdämlek” redaksiäse Duslıq yortına küçenep kilde, ä bu inde yılına 200- 300 meñ sum aqça ekonomiä digän süz, çönki utqa, suğa, internetqa, telefonğa, arendağa tülämäskä.
Ğomumän, milli xäräkättä soñğı öç yılda üzgäreşlär zur häm yaxşı yaqqa. Samar tatar milli xäräkäte yıldan- yıl yäşärä, häm tatar xäräkätenä mallı irlär kilä.
“Tuğan tel” cämğiäteneñ Ustavına üzgäreşlär kertelde. Elek citäkçelär 3 yılğa saylansa, xäzer 5 yılğa saylana, monda da izge niät küzdä totıla. 5 yıl eçendä här lider täcribä tuplap ölgerä. “Tuğan tel” prezidentı itep qabat ber tawıştan Änwär Bul'xin saylandı, ä tözeleş buyınça urınbasarı bulıp general' direktor Wazıx Möxämmätşin, Tatarstan Respublikası belän elemtädä toru yöklären üz östenä general' direktor Fäxretdin Kanyukaev aldı, ä cämğıätneñ finans yağın qayğırtunı zur tözeleşneñ general' direktorı Minnäxmät Xaliullov cilkäsenä saldılar.
Älbättä bolar pozitiv, uñay üzgäreşlär. Läkin dä problemalar da baştin aşqan. Tatar awıllarındağı kitapxanälärdä islam dine turında kitaplar bötenläy yuq!
Milli xäräkättä genä tügel, bügenge tatarlarda yuaşlıq köçle, ä yuaş keşe belän älläni maytarıp bulmıy. Kiräk urında taläp itä torğan şäxeslärneñ sanı artırğa tieş.
Zamanında Georgiev ordenın möselmanğa birgändä, täresez yasağannar. Bügenge şovinizm rus imperiäsen uzdıra. Quldan millät kitä, tel yuğala, milli xäräkätneñ üz ideologların , üz polittexnologların buldırırğa kiräk, qayçandır şaw ideologiädän torğan milli xäräkät, bügen biznes eçendä häm bu soqlanırlıq küreneş. Ä tormış şunı kürsätte – malquarnı üsterügä qarağanda, milli ideolognı üsterergä , äzerlärgä awırraq ikän.”
Şamil Bahautdin, Samar
