Казанда БРИКС уеннарын оештыруга 1 млрд 200 млн сум тотканнар. Бу хакта Татарстан спорт министры Владимир Леонов әйтте, дип яза "Бизнес Online".
Аның сүзләренчә, 1 млрд сумны федераль бюджет бүлеп биргән, ә калган 200 млн сумын Татарстан түләгән. Моңа спорт объектларын һәм шәһәр инфраструктурасын төзекләндерүгә киткән чыгымнар керми.
— Яңа проект өчен бу начар саннар түгел, без моңа сыештык. Беркемгә дә билетлар сатып алмадык. Безгә килүчеләр боларны үз кесәләреннән түләде, ә чикләүләр кертелгән шартларда Русиягә килеп җитүнең ничек авыр булуын аңлыйсыздыр. Безгә спортчыларын җибәргән илләргә рәхмәт әйтергә кирәк, дигән Леонов.
Министр биргән белешмәләргә күрә, БРИКС уеннарында 82 илдән 5,6 мең спортчы катнашкан. Ачылу тантанасында 90 нан артык дәүләттән, шул исәптән Русия белән "дус булмаган" Британия, Франция кебек илләрдән дә вәкилләр булачак диелгән иде.
Казан башкарма комитетының тышкы төзекләндерү комитеты башлыгы Игорь Сәләхетдинов сүзләренчә, БРИКС уеннары һәм җыены маршрутларын төзекләндерүгә 7,9 миллиард сум бирелгән, шуларның 6,1 млрды юлларга тотылган, калганнары җәмәгать урыннарына.
- Татарстан башкаласында БРИКС уеннары 12-23 июньдә үтте.
- Бу чара Русия Украинага каршы сугыш алып барган чорда узды. Халыкара Олимпия комитеты һәм абруйлы оешмалар бу турнирны танымавын белдерде. Иң оста спортчылар да ярышларга килмәде. Шулай да, Казан бу чарага ныклап әзерләнде. Турнир вакытына хәмер сатуны тыю, юлларны ябу, Кабан күлендә көймәдә йөзүне тыю кебек төрле чикләүләр кертелде. Бу юлы уеннарда татарча көрәшне күзәтеп булды һәм ахырдан спортчыларны Сабантуйга алып бардылар.
🛑 Русиядә Азатлык сайты томаланды, нишләргә? Безнең кулланма.
🌐 Безнең Telegram каналына да кушылырга онытмагыз!
Форум